Тошкент вилоятида қарийб 8 гектар ерни 144 минг долларга сотишга уринган шахс ушланди
Тошкент ва Самарқанд вилоятларида ер майдонлари савдоси билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Оҳангарон туман бўлими томонидан ИИВ ходимлари билан ҳамкорликда тезкор тадбир ўтказилган. Тадбирда фуқаро Р.Х. Юқори Чирчиқ тумани, “Бирлик” МФЙ ҳудудидаги “Р.Т.” МЧЖга қарашли 7,8 гектар ер майдонини фуқаро М.Х.га 144 минг долларга сотишга келишгани аниқланган. У гўёки юқори лавозимда ишловчи танишлари ёрдамида ер майдони кадастр ҳужжатларини расмийлаштириб бериши эвазига олдиндан 10 минг долларни олган вақтида ашёвий далиллар билан ушланган.
Шу каби, департамент ҳамда ДХХнинг Самарқанд вилояти бошқармалари томонидан ўтказилган тезкор тадбирда фуқаро К.Ф. ўғли Ш.Ф.нинг Самарқанд туманидаги “Қ.М.” фермер хўжалигининг 15 гектар ер майдонини фирибгарлик йўли билан фуқаро Х.Ф.га ҳар бир гектарини минг доллардан ҳисоблаб сотишга келишиб, 15 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Навоийда 80 гектар ер майдонини харидорга 1 миллиард сўмга сотишга келишиб, олдиндан 700 миллион сўм олган туман фавқулодда вазиятлар бўлими ходими қўлга олинган эди.
