Xorazmda oilaviy tadbirkorlik dasturlari uchun berilgan 940 mlrd so‘mga qo‘shimcha 100 mlrd so‘m yo‘naltiriladi
Ayni vaqtda prezident Shavkat Mirziyoyev xalq deputatlari Xorazm viloyati Kengashi sessiyasida ishtirok etmoqda. Bu haqda “Daryo” muxbiri xabar berdi.
Davlat rahbari viloyat hokimi Jo‘rabek Rahimovga so‘z berdi va undan viloyat imkoniyatlarini ishga solish bo‘yicha taklif va rejalarini so‘radi.
Hokim dastlab aholi bandligini taʼminlash va daromadini oshirish masalalari bo‘yicha rejalarini maʼlum qildi. Prezident bu borada mutasaddilarga qator topshiriqlarni berdi.
Xususan, 1-iyulgacha oilaviy tadbirkorlik dasturlari uchun berilgan 940 milliard so‘mga qo‘shimcha 100 milliard so‘m yo‘naltiriladi. Xiva shahridagi xizmat ko‘rsatish texnikumi hamda Shovotdagi Qurilish kasb-hunar kolleji binosida mono-markaz tashkil etiladi.
Shuningdek, yil yakuniga qadar “kooperatsiya markaz”lari Xonqa, Gurlan, Hazorasp va Qo‘shko‘pirdagi bo‘sh turgan davlat mulki negizida ham tashkil qilinadi. 1-iyulga qadar tadbirkorlik rivojlangan 94 ta mahallada mikro-markazlar tashkil qilinib, u yerdagi loyihalarga yana 50 milliard so‘m imtiyozli kredit yo‘naltiriladi.
Bundan tashqari:
- 2023-yilda mahallalarga oilaviy tadbirkorlikni olib kirish va yangi tadbirkorlarni tashkil qilish orqali 57 ming aholi;
- kasanachilikda salohiyati bor 240 ta mahallada mehnat qurollari va joy masalasini hal qilib, 50 ming aholi;
- yangi kasblarga o‘qitib, o‘zini-o‘zi band qilish orqali 28 ming aholi bandligi taʼminlanadi.
