ДХХ Наманганда 1,5 килодан ортиқ олтин қуймаларининг ноқонуний савдосига чек қўйди

Давлат хавфсизлик хизматининг Наманган вилояти бўйича бошқармаси ходимлари томонидан бошқа ҳуқуқ-тартибот идоралари билан ҳамкорликда ўтказилган тезкор тадбирлар натижасида олтин қуймаларининг ноқонуний муомаласига чек қўйилди.

Дастлаб Андижон шаҳрида яшовчи, 1984 йилда туғилган муқаддам судланган шахс оғирлиги 672 грамм бўлган бир бўлак олтин қуймасини Наманган шаҳрида истиқомат қилувчи, 1981 йилда туғилган заргарга 40 минг долларга сотган вақтида уларнинг иккаласи ҳам ушланган.

Сўнгра ушбу заргар буюртмасига кўра, Олмалиқ шаҳридан оғирлиги 613 грамм бўлган бир бўлак олтин қуймасини олиб кетаётган Наманган шаҳрида яшовчи, 1986 йилда туғилган фуқаро бошқарувидаги Cobalt русумли автомашина Чуст туманида тўхтатилиб, ашёвий далил процессуал тартибда расмийлаштириб олинган.

Бошқа бир ҳолатда эса Наманган шаҳрида яшовчи, 1991 йилда туғилган муқаддам судланган шахс Поп тумани ҳудудида Ангрен шаҳрида истиқомат қилувчи, 1988 йилда туғилган фуқаро билан учрашиб, ундан оғирлиги 250 грамм бўлган 3 та олтин қуймасини сотиб олган вақтида уларнинг иккаласи ҳам ушланди.

Ўтказилган тезкор тадбирлар натижасида умумий баҳоси 1 миллиард 124 миллион сўмлик, жами 1 килограмм 535 грамм олтин қуймалари ҳамда 40 минг АҚШ доллари ашёвий далил сифатида олинган.