“Ўзчармсаноат” уюшмаси делегациясининг Жанубий Кореяга амалга оширган ташрифи давомида мазкур мамлакатнинг автомобилсозлик корхоналари учун чарм маҳсулотларини етказиб берувчи JМ компанияси билан учрашув бўлиб ўтди. Бу ҳақда уюшма матбуот хизмати хабар берди.
Мулоқотда Ўзбекистонда ишлаб чиқарилаётган чарм маҳсулотлар сифати, хом ашё базаси, корхоналарда қўлланаётган замонавий технологиялар, инвест муҳит тўғрисида Корея компаниясига батафсил маълумот берилган.
JМ компанияси Жанубий Кореядаги энг йирик чарм ишлаб чиқарувчи корхона саналади. Бу ерда тайёрланаётган чарм маҳсулотлар асосан Hyundai, Кiа, Toyota компаниялари автомобилларига етказиб берилади. Компаниянинг йиллик даромади 250 миллион долларни ташкил этади. 1 миллиард доллар эвазига барпо этилган ишлаб чиқариш корхонаси тўлиқ Италия ва Германия технологиялари билан жиҳозланган.
“Мулоқотда компания Ўзбекистонда сўнгги йилларда чармсаноат соҳасидаги ўзгаришлар ва янгиланишлардан хабардор экани, шу сабаб чармнинг иккиламчи ва тайёр ҳолдаги кўринишини айнан мамлакатимиздан харид қилишни режалаштираётганини маълум қилди”, — дейилади хабарда.
Шунингдек, “Ўзчармсаноат” уюшмаси делегацияси ишлаб чиқариш жарайонлари, маҳсулотлар сифати билан яқиндан танишган. Шу ернинг ўзида JМ компанияси вакилларига Ўзбекистоннинг 16 та ҳудудида ташкил этилган КSZлари ва уларда чармсаноат соҳасига йўналтирилган лойиҳаларни амалга ошириш бўйича бизнес таклифлар тақдим этилган.
Компания Тошкент вилоятида қўшма корхона очиш ва у ерда ишлаб чиқариладиган чармни Жанубий Корея бозорига ва автомобилсизлик соҳасидаги йирик компанияларга етказиб бериш бўйича ўз ташаббусларини билдирган.
Компания делегацияси апрель ойида Тошкентга ташриф буюриб чарм ишлаб чиқарувчи маҳаллий корхоналар билан музокарлар ўтказишга ва амалга ошириладиган лойиҳаларни муҳокама қилиб олишга тайёр эканини маълум қилган.
Изоҳ (0)