Блинкен АҚШ фуқароларини зудлик билан Россияни тарк этишга чақирди 

АҚШ Давлат котиби Энтони Блинкен Россиядаги барча Америка фуқаролари зудлик билан мамлакатни тарк этишга чақирди. Тегишли баёнот Давлат департаменти сайтида эълон қилинди.

Америкалик дипломатнинг мазкур баёноти The Wall Street Journal журналисти Эван Гершковичнинг Россия хавфсизлик хизмати томонидан ҳибсга олиниши фонида эълон қилинди. Блинкен АҚШ Давлат департаментининг устувор вазифаси хориждаги Америка фуқароларининг хавфсизлиги эканини таъкидлади.

“Кремлнинг журналистлар ва фуқаролик жамияти вакилларини қўрқитиш, репрессия қилиш ва жазолаш бўйича давом этаётган саъй-ҳаракатларини кескин қоралаймиз. Биз Россия федерацияси ҳудудида АҚШ фуқароларига таҳдид солаётган хавф ҳақида қаттиқ огоҳлантиришимизни такрорлаймиз. Россияда яшовчи ёки саёҳат доирасида қолган америкаликлар зудлик билан у ерни тарк этиши керак”, — деди Давлат котиби.

Шунингдек, сиёсатчи унинг идораси америкалик мухбирнинг ҳибсга олиниши билан боғлиқ вазият бўйича The Wall Street Journal вакиллари билан алоқада эканини таъкидлади.

The Wall Street Journal нашри журналистининг ҳибсга олиниши

30 март куни Россия федерал хавфсизлик хизмати (РФХХ) Екатеринбургда WSJ газетаси мухбири Эван Гершковични жосусликда гумон қилиб ҳибсга олди. 

Россия хавфсизлик хизматига кўра, Эван Гершкович Америка томонининг кўрсатмаси бўйича Россия ҳарбий-саноат комплекси корхоналаридан бирининг фаолияти тўғрисида давлат сирини ташкил этувчи маълумотларни тўплаган. 

“Гершкович махфий маълумотларни олишга уринаётганда, Екатеринбургда қўлга олинди», — дея таъкидлади РФХХ.

Россия хавфсизлик хизматининг Тергов департаменти АҚШ фуқаросига нисбатан Жиноят кодексининг 276-моддаси (жосуслик) бўйича жиноий иш қўзғатди.

Россия ТИВ расмий вакили Мария Захарова WSJ нашри ходими фаолиятининг журналистикага ҳеч қандай алоқаси йўқлигини айтди. 

“Американинг WSJ нашри ходими Екатеринбургда қилган ишининг журналистикага алоқаси йўқ. Афсуски, хорижликлар мамлакатимизда “хорижий мухбир” мақоми, журналист визаси ва аккредитациядан журналистикага тегишли бўлмаган фаолиятни яшириш учун фойдаланаётгани биринчи ҳолат эмас. Бу қўлга олинган биринчи таниқли ғарблик эмас”, — деган Захарова.

Бундан ташқари, Россия  президентининг матбуот котиби Дмитрий Песков журналистнинг ҳибсга олинишига изоҳ берди.

“Бизга маълум бўлишича, у жиноят устида қўлга олинган”, — деди Кремл матбуот котиби. 

Шу билан бирга, Песков “оддий журналистик фаолият” билан шуғулланувчи The Wall Street Journal вакилларининг Россияда кейинги фаолияти учун ҳеч қандай тўсиқ кўрмаётганини таъкидлади.

WSJ Россия ҳибсда сақланаётган мухбир Гершковичга қўйилган айбловларни рад этиб, уни зудлик билан озод қилишни талаб қилмоқда.

Маълумот ўрнида, Эван Гершкович 1986 йилдан бери Россияда жосусликда айбланиб ҳибсга олинган биринчи америкалик журналист бўлди. 1986 йил 2 сентябрда «У.С. News & World Report» журналида ишлаган Николас Данилофф СССРда ҳибсга олинганди