Дональд Трампга қарши жиноий айблов эълон қилинди
Манхеттен округидаги катта ҳакамлар ҳайъати 30 март куни Дональд Трампга жиноий иш бўйича айблов эълон қилиш учун овоз берди, деб ёзади The New York Times тўртта манбага таяниб. Орадан бир неча соат ўтгач, бу маълумот прокуратура томонидан расман тасдиқланди.
Прокурорлар сиёсатчини қўлга олиш вақтини келишиш учун собиқ президентнинг адвокатлари билан боғланган. Трампнинг ҳимоячилари айтишича, бу кейинги ҳафта содир бўлиши мумкин. Трамп қўлга олиниб, суратга туширилиши, шунингдек, ундан бармоқ излари олиниши кутилмоқда, шундан сўнг судья унга нисбатан қандай эҳтиёт чораси белгилаш ҳақида қарор қабул қилади. Бу АҚШ тарихида биринчи марта мамлакатнинг амалдаги ёки собиқ президентига жиноий айблов қўйилишидир.
Трампнинг қароргоҳи жойлашган Флорида штати губернатори Рон ДеСантиснинг айтишича, агар Нью-Йорк прокурорлари томонидан экстрадиция сўрови юборилса, штат унга жавоб қайтармайди.
Айблов тафсилотлари туман прокурорининг қарори билан бир неча кун ичида эълон қилинади. Маълумотларга кўра, АҚШ собиқ президенти жиддий моддада айбланмоқда — бу 2016 йилги сайловлар олдидан Трампнинг адвокатлари собиқ актриса Сторми Дэниэлсга жим юриши учун 130 минг доллар тўлагани билан боғлиқ.
Сиёсатчининг ўзи Дэниэлс билан алоқани рад этди, унга пул тўланганини изоҳлашдан бош тортди. NYT сўровига жавобан Трамп унга қарши очилган ишни сиёсий мотивли деб атади. CNN иш билан таниш бўлган икки манбага таяниб, Трампга қарши ишда ўттиздан ортиқ фирибгарлик айбловлари борлигини ёзмоқда.
