Hozirgi vaqtda 11 mingdan ortiq ukrainalik harbiy xizmatchilar xorijda malaka oshirmoqda. Ukraina himoyachilarini o‘qitish “koalitsiyasi”ga 26 ta davlat qo‘shilgan. Bu haqda Pentagon spikeri general Patrik Rayder ma’lum qildi, deb yozmoqda CNN.
Generalning so‘zlariga ko‘ra, 2022-yilning aprel oyidan beri ukrainalik harbiylar 20 dan ortiq jangovar tizimlar bo‘yicha 40 dan ortiq turli o‘quv dasturlarida qatnashgan.
Shu bilan birga, Rossiyaning keng ko‘lamli bosqini boshlanganidan beri AQSHdan kelgan mutaxassislar yetti mingdan ortiq ukrainalik harbiy xizmatchilarni o‘qitgan.
“Bu hafta Oklaxoma shtatidagi Fort-Sill shahrida Patriot havo mudofaa tizimi bilan ishlashni mashq qilgan 65 nafar ukrainalik kursni tamomlab, Yevropaga qaytdi”, — dedi Rayder.
Shuningdek, u mart oyi oxirida to‘rt mingdan ortiq ukrainalik harbiy xizmatchilar Germaniyada umumiy tayyorlov mashg‘ulotlaridan o‘tishini, kelgusida ular Bradley va Stryker jangovar mashinalarini boshqarishini ta’kidladi.
“Qo‘shma Shtatlar ushbu mashg‘ulotlarni davom ettiradi va Ukraina xalqiga mamlakatni himoya qilish, Rossiya agressiyasini qaytarish uchun zarur bo‘lgan mudofaa yordamini ta’minlash uchun ittifoqchilar va hamkorlar bilan yaqindan ishlaydi. Biz Ukrainani qancha vaqt kerak bo‘lsa, shuncha qo‘llab-quvvatlashga ahd qilganmiz”, — dedi general.
Avvalroq ukrainalik tankchilar guruhi qarshi hujumda qo‘llanilishi kutilayotgan Challenger 2 tanklari bilan ishlash bo‘yicha Britaniyada mashg‘ulotlarni tugatib vataniga qaytgandi.
Izoh (0)