Афғонистон ғарбидаги Ҳирот вилоятига “Толибон” томонидан тайинланган расмийлар кўкнори етиштиришга қарши кампания бошланганини эълон қилди. Бу ҳақда 30 март куни TOLOnews телеканали хабар берди.
“Турли ҳудудларда аллақачон юзлаб акр ерлар кўкноридан тозаланган, амалиётимиз давом этмоқда”, — дея Ҳирот наркотикка қарши кураш бўлими раҳбари Ҳаятуллоҳ Руҳонийнинг сўзларидан иқтибос келтирди телеканал.
Кўкнори майдонларини йўқ қилиш кампанияси ҳосилни йиғиб олиш мавсумига оз вақт қолганда бошланди. Қайд этилишича, гиёҳванд моддаларни назорат қилиш бошқармаси ходимларига “Толибон” махсус кучлари ҳамроҳлик қилмоқда.
TOLOnews хабарига кўра, Ҳирот вилояти аҳолиси ҳукуматни гиёҳванд модда ўсимликлари ўрнига муқобил экинлар етиштиришда ёрдам беришга чақирган.
Афғонистон ғарбидаги Ғор ва Бодғис вилоятлари, мамлакат жануби-ғарбидаги Нимрўз вилоятларида ҳам кўкнорини йўқ қилиш амалиётлари олиб борилмоқда.
“Толибон” Афғонистонда 2021 йил августида ҳокимиятни қўлга киритгач, мамлакатда кўкнори етиштириш ва афюн тарқалишига қарши курашиш ниятини эълон қилганди. Ўтган апрель ойида ҳаракат Афғонистон бўйлаб кўкнори етиштиришни расман тақиқлади. Бундай буйруқни ҳаракатнинг олий раҳбари Ҳайбатулла Охундзода берган.
Аммо 2022 йил охирида Бирлашган Миллатлар Ташкилотининг Наркотик ва жиноятчиликка қарши кураш бўйича бошқармаси маълум қилишича, “Толибон” даврида Афғонистонда кўкнори етиштириш 32 фоизга ошган ва 233 минг гектарни ташкил қилган. Бошқарма маълумотларига кўра, асосий экин майдонлари Афғонистоннинг жануби-ғарбий вилоятларида — улар кўкнори етиштириладиган умумий майдоннинг 73 фоизини ташкил этади, бу ерда ҳосилдорликнинг энг катта ўсиши кузатилган.
Изоҳ (0)