30 март куни кечқурун Туркия парламенти Бош ассамблеяси Финляндиянинг НАТОга кириши ҳақидаги протоколни ратификация қилди, деб ёзмоқда “Anadolu”.
Бир неча кун олдин Финляндиянинг НАТОга кириши Венгрия парламенти томонидан қўллаб-қувватланган эди. Шундан сўнг Туркия Финляндиянинг Шимолий Атлантика алянсига киришини маъқуллаши керак бўлган сўнгги НАТО мамлакати бўлиб қолди.
Финляндия ва Швеция 2022 йилнинг май ойида, Россия Украинага кенг кўламли босқин бошлаганидан кўп ўтмай, НАТОга аъзо бўлиш ниятини эълон қилди. Мамлакатлар иттифоққа қўшилиш учун биргаликда ариза топширди.
Февраль ойининг бошига келиб, Шимолий Атлантика алянсига янги аъзоларни қабул қилиш тўғрисидаги протокол Венгрия ва Туркиядан ташқари НАТОга аъзо барча давлатлар томонидан ратификация қилинди. Иккала давлат расмийлари Финляндиянинг алянсга киришига қарши эмасликларини, бироқ турли сабабларга кўра Швециянинг аризасини қўллаб-қувватлашга тайёр эмаслигини билдирди.
Ҳозирда НАТО таркибига 30 та давлат киради. Янги давлат алянсга унинг аризаси НАТОнинг барча аъзолари маъқуллаган тақдирдагина қўшилиши мумкин.
Изоҳ (0)