Шавкат Мирзиёев Бирлашган Араб Амирликлари вице-президенти лавозимига тайинланган Шайх Мансур бин Зоид ал-Наҳаён ҳамда Абу-Даби амирлиги валиаҳди этиб тайинланган Шайх Ҳолид бин Муҳаммад бин Зоид ал-Наҳаёнга табриклар йўллади. Бу ҳақда Президент матбуот хизмати раҳбари хабар берди.
Давлат раҳбари уларни ушбу янги тайинловлар билан самимий қутлаб, энг эзгу тилакларини билдирган. Биродар Амирликлар халқига тинчлик-осойишталик, давомий равнақ ва тараққиёт тилаган.
“Мактубларда биргаликдаги интилишлар ва қатъий саъй-ҳаракатлар туфайли охирги йилларда Ўзбекистон ва БАА ўртасида қарор топган кенг қамровли алоқалар ўзаро ишонч, юксак ҳурмат ва бир-бирини қўллаб-қувватлаш тамойиллари асосида янги босқичга кўтарилишига ишонч билдирилган”, — дейилади хабарда.
Аввалроқ Шавкат Мирзиёев номига АҚШ президенти Жо Байдендан мактуб келгани тўғрисида хабар берилганди. Февраль ойида ҳам Байден Ўзбекистон президентига мактуб йўллаганди. Ўшанда у Шавкат Мирзиёевга мамлакатлар ўртасидаги муносабатларни мустаҳкамлашда кўрсатаётган етакчилиги ва шахсий интилиши учун, шу жумладан, хавфсизлик соҳасидаги ҳамкорлик учун чуқур миннатдорлик билдирган эди.
Изоҳ (0)