Shavkat Mirziyoyev BAA vitse-prezidenti va Abu-Dabi amirligi valiahdiga tabrik maktublarini yo‘lladi
Shavkat Mirziyoyev Birlashgan Arab Amirliklari vitse-prezidenti lavozimiga tayinlangan Shayx Mansur bin Zoid al-Nahayon hamda Abu-Dabi amirligi valiahdi etib tayinlangan Shayx Holid bin Muhammad bin Zoid al-Nahayonga tabriklar yo‘lladi. Bu haqda Prezident matbuot xizmati rahbari xabar berdi.
Davlat rahbari ularni ushbu yangi tayinlovlar bilan samimiy qutlab, eng ezgu tilaklarini bildirgan. Birodar Amirliklar xalqiga tinchlik-osoyishtalik, davomiy ravnaq va taraqqiyot tilagan.
“Maktublarda birgalikdagi intilishlar va qatʼiy saʼy-harakatlar tufayli oxirgi yillarda O‘zbekiston va BAA o‘rtasida qaror topgan keng qamrovli aloqalar o‘zaro ishonch, yuksak hurmat va bir-birini qo‘llab-quvvatlash tamoyillari asosida yangi bosqichga ko‘tarilishiga ishonch bildirilgan”, — deyiladi xabarda.
Avvalroq Shavkat Mirziyoyev nomiga AQSH prezidenti Jo Baydendan maktub kelgani to‘g‘risida xabar berilgandi. Fevral oyida ham Bayden O‘zbekiston prezidentiga maktub yo‘llagandi. O‘shanda u Shavkat Mirziyoyevga mamlakatlar o‘rtasidagi munosabatlarni mustahkamlashda ko‘rsatayotgan yetakchiligi va shaxsiy intilishi uchun, shu jumladan, xavfsizlik sohasidagi hamkorlik uchun chuqur minnatdorlik bildirgan edi.
