Фарғона вилояти Риштон туманида жойлашган марказий истироҳат боғидаги аттракциондан 17 ёшли қиз тушиб кетди. Бу ҳақда вилоят ИИБ ахборот хизмати хабар берди.
Қайд этилишича, 2005 йилда туғилган Н.О. 23 март куни туман марказий истироҳат боғидаги “Пирацкий корабл” номли аттракционда учаётиб, эҳтиётсизлик оқибатида аттракциондан тушиб кетиб, тан жароҳати олган ҳамда туман тиббиёт бирлашмасининг қабул бўлимига олиб келинган.
Мазкур ҳолат юзасидан шу куннинг ўзида Риштон тумани ИИБ томонидан тегишли тартибда ҳужжатлар расмийлаштирилган. Н.О.нинг олган тан жароҳати бўйича судга оид тиббий экспертиза тайинланган.
Ҳодиса сабабларига ойдинлик киритиш, меҳнатни муҳофаза қилиш ва техника хавфсизлиги қоидаларига риоя қилинган ёки қилинмаганини аниқлаш юзасидан Бандлик бошқармасига тегишли ҳужжатлар тақдим этилган.
“Ҳозирги кунда вояга етмаган Н.О. Бағдод туман тиббиёт бирлашмасида шифокорларнинг назоратида даволанмоқда ва аҳволи яхшиланяпти”, — дейилади хабарда.
Ҳолат юзасидан Риштон тумани ИИБ томонидан терговга қадар текширув ҳаракатлари олиб борилмоқда.
Аввалроқ Бухоро шаҳрида жойлашган истироҳат боғида эр-хотин ва уларнинг фарзанди аттракциондан йиқилгани тўғрисида хабар берилганди. “Контехназорат”нинг маълум қилишича, ушбу аттракциондан фойдаланиш тақиқланган бўлган.
Изоҳ (0)