Таълим муассасаларида ҳалок бўлган ҳарбий хизматчиларнинг жасорати тарғиб қилинади

Ўзбекистонда таълим муассасаларида ҳалок бўлган ҳарбий хизматчиларнинг жасорати тарғиб қилинади. Бу ҳақда Мудофаа вазирлиги ахборот хизмати маълум қилди.

Президентнинг тегишли фармони билан офицерлар таркибидаги ҳалок бўлган ҳарбий хизматчиларнинг номлари Мудофаа вазирлиги олий ҳарбий таълим муассасаларига бириктирилди.

Мудофаа вазирлиги тизимида Ватан ҳимояси ва тинчлиги йўлида ҳалок бўлган ҳарбий хизматчилар оилалари ҳарбий қисм ва муассасалар томонидан оталиққа олинди. Шунингдек, ҳалок бўлганларни бириктирилган ҳарбий қисм, муассасаларнинг бўлинма шахсий таркиби рўйхатига киритиш ҳамда тунги йўқлама вақтида уларнинг номларини мунтазам ўқиб эшиттириш каби ишлар кўзда тутилган.

Бундан ташқари, ҳалок бўлган ҳарбий хизматчилар ва ходимларнинг оила аъзоларига белгиланган имтиёз ва кафолатларни татбиқ этиш тартибини белгиловчи норматив-ҳуқуқий ҳужжатлар ҳамда “Фахрийлар тўғрисида”ги, “Ҳарбий хизматчилар мақоми ва уларни ижтимоий ҳимоя қилиш тўғрисида”ги ва “Ҳарбий хизматчиларнинг пенсия таъминоти тўғрисида”ги қонунлари лойиҳаларини ишлаб чиқилмоқда.