1 апрелдан Қозоғистонда республика чегарасидан ўтаётган барча товарларни кузатиб борувчи онлайн тизим ишга тушади. Бу ҳақда Financial Times хабар бермоқда.
Қозоғистон ушбу янгилик билан мамлакат Ғарб давлатлари томонидан Россияга нисбатан қўйган чекловларга амал қилаётганини намойиш қилмоқчи.
“Ҳукуматимиз Қозоғистон Россия билан савдога ҳеч қандай санкция ёки чекловлар қўймаслигини бир неча бор ва жуда аниқ таъкидлаган. Бироқ у Ғарб санкцияларини четлаб ўтишга йўл қўймайди ва бундай четлаб ўтиш платформасига айланмайди. Биз иккиламчи санкциялар билан боғлиқ барча хавфларни тушунамиз, шунинг учун барча ҳамкорлар билан ўзаро савдо-сотиқимизни диққат билан кузатиб борамиз”, — дейди манба.
Қозоғистон Россия билан биргаликда Евросиё иқтисодий иттифоқига аъзо бўлиб, унинг доирасида товарлар божхона назоратисиз олиб ўтилади.
Financial Times’нинг Қозоғистон ҳукуматидаги манбаси маълум қилишича, янги тизим реал вақт режимида республика чегараси орқали товарлар ҳаракатининг бутун занжирини кузатиш имконини беради.
2022 йил июнь ойида Қозоғистон президенти Қосим-Жўмарт Тўқаев Остона Россия билан ҳамкорликда Ғарб санкцияларини бузмоқчи эмаслигини айтганди.
Ўша йилнинг декабрь ойида Қозоғистон Ташқи ишлар вазирлиги Россияга қарши санкцияларнинг мамлакат иқтисодиётига салбий таъсирини тан олди.
Россия Қозоғистоннинг энг йирик савдо шериги бўлиб қолмоқда. Reuters маълумотларига кўра, унинг экспорти 2022 йилда чоракка ўсиб, 8,8 миллиард долларни ташкил этган.
Агентлик маълумотларига кўра, сўнгги ҳафталарда Россия компаниялари қозоғистонлик ҳамкорларидан Ғарб санкцияларини четлаб ўтиш ва зарур товарларни импорт қилишда ёрдам беришни фаолроқ сўрамоқда.
Изоҳ (0)