Адлия вазирлигига ҳуқуқий экспертизадан ўтказиш учун 2022 йил давомида 2 минг 667 та норматив-ҳуқуқий ҳужжатлар лойиҳаси киритилган. Бу ҳақда 29 март куни Адлия вазирлигида бўлиб ўтган матбуот анжуманида маълум қилинди, дея хабар бермоқда “Дарё” мухбири.
Анжуманда экспертизадан ўтказиш учун киритилган ҳуқуқий ҳужжатларнинг 288 таси қонун ҳужжатлари, 856 таси президент ҳужжатлари ва 1 минг 523 таси эса ҳукумат қарорларидан иборат эканлиги айтиб ўтилди.
Киритилган 442 та лойиҳа регламент талабларига риоя қилинмагани боис ишлаб чиқарувчиларга қайтарилган. Ҳуқуқий экспертизадан ўтказилган 2 минг 225 та лойиҳадан 1 минг 546 тасига ижобий хулоса берилган бўлса, 679 таси жиддий ёки концептуал эътироз билан қайтарилган.
Лойиҳа тайёрлаб, уни экспертизага киритишда қўйилган талабларга тўла риоя қилишда энг юқори натижа кўрсатган вазирлик ва идораларнинг рўйхати тақдим этилди. Унга кўра:
- Молия вазирлиги киритган 138 та лойиҳадан 109 тасига ижобий хулоса берилган;
- Транспорт вазирлиги киритган 65 та лойиҳадан 48 тасига ижобий хулоса берилган;
- Давлат божхона қўмитаси киритган 52 та лойиҳадан 38 тасига ижобий хулоса берилган;
- Ички ишлар вазирлиги киритган 138 та лойиҳадан 95 тасига ижобий хулоса берилган;
- Иқтисодиёт вазирлиги киритган 143 та лойиҳадан 93 тасига ижобий хулоса берилган.
Мос равишда салбий натижа кўрсатган вазирлик ва идоралар бешлиги ҳам эълон қилинди:
- Уй-жой коммунал хизмат кўрсатиш вазирлиги киритган 43 та лойиҳадан 24 таси қайтарилган;
- Қишлоқ хўжалиги вазирлиги киритган 90 та лойиҳадан 45 таси қайтарилган;
- Инвестициялар ва ташқи савдо вазирлиги киритган 160 та лойиҳадан 78 таси қайтарилган;
- Туризм ва маданий меърос вазирлиги киритган 69 та лойиҳадан 33 таси қайтарилган;
- Маданият вазирлиги киритган 67 та лойиҳадан 29 таси қайтарилган.
Мавзуга доир:
Изоҳ (0)