АҚШ 2022—2024-молиявий йилларда дунёда демократияни қўллаб-қувватлаш учун 9,5 миллиард доллар ажратишни режалаштирмоқда, дейилади Оқ уй сайтида берилган баёнотда.
“2022, 2023 ва 2024-молиявий йилларда Қўшма Штатлар бутун дунё бўйлаб демократия, инсон ҳуқуқлари ва яхши бошқарувни қўллаб-қувватлаш учун тахминан 9,5 миллиард доллар сармоя киритди ва киритиш ниятида”, — дейилади баёнотда.
28 март куни АҚШда “Демократия саммити” бошланди, тадбир 30 мартгача давом этади. Унда 120 та давлат раҳбарлари иштирок этади. Учрашувларда Украинадаги уруш, коррупцияга қарши кураш, демократияни ривожлантириш бўйича ҳамкорлик, хотин-қизларнинг мақоми ва бошқа масалалар муҳокама қилинади. Қўшма Штатлар ўзининг биринчи “Демократия саммити”ни 2021 йил декабрь ойида ўтказганди, ҳозиргиси — иккинчи.
АҚШ президенти Жо Байден саммит очилишида сўзлаган нутқида Қўшма Штатлар икки йил ичида демократияни, жумладан, мустақил матбуотни, бутун дунёда эркин ва адолатли сайловларни қўллаб-қувватлаш учун 690 миллион доллар ажратишини айтди.
Байден, шунингдек, дунёнинг демократик давлатлари, унинг нуқтаи назарида “кучлироқ”, автократиялар эса аксинча, бўлганини таъкидлади. Демократияни “доимий ҳимоя қилиш керак”, дея қўшимча қилди АҚШ президенти.
Изоҳ (0)