AQSH dunyoda demokratiyani qo‘llab-quvvatlash uchun 9,5 mlrd dollar ajratadi

AQSH 2022—2024-moliyaviy yillarda dunyoda demokratiyani qo‘llab-quvvatlash uchun 9,5 milliard dollar ajratishni rejalashtirmoqda, deyiladi Oq uy saytida berilgan bayonotda.

“2022, 2023 va 2024-moliyaviy yillarda Qo‘shma Shtatlar butun dunyo bo‘ylab demokratiya, inson huquqlari va yaxshi boshqaruvni qo‘llab-quvvatlash uchun taxminan 9,5 milliard dollar sarmoya kiritdi va kiritish niyatida”, — deyiladi bayonotda.

28-mart kuni AQSHda “Demokratiya sammiti” boshlandi, tadbir 30-martgacha davom etadi. Unda 120 ta davlat rahbarlari ishtirok etadi. Uchrashuvlarda Ukrainadagi urush, korrupsiyaga qarshi kurash, demokratiyani rivojlantirish bo‘yicha hamkorlik, xotin-qizlarning maqomi va boshqa masalalar muhokama qilinadi. Qo‘shma Shtatlar o‘zining birinchi “Demokratiya sammiti”ni 2021-yil dekabr oyida o‘tkazgandi, hozirgisi — ikkinchi.

AQSH prezidenti Jo Bayden sammit ochilishida so‘zlagan nutqida Qo‘shma Shtatlar ikki yil ichida demokratiyani, jumladan, mustaqil matbuotni, butun dunyoda erkin va adolatli saylovlarni qo‘llab-quvvatlash uchun 690 million dollar ajratishini aytdi.

Bayden, shuningdek, dunyoning demokratik davlatlari, uning nuqtai nazarida “kuchliroq”, avtokratiyalar esa aksincha, bo‘lganini ta’kidladi. Demokratiyani “doimiy himoya qilish kerak”, deya qo‘shimcha qildi AQSH prezidenti.