Франция президентини ижтимоий тармоқда ҳақорат қилган аёл ҳибсга олинди 

Франция полицияси ижтимоий тармоқда мамлакат президенти Эммануэл Макронни ҳақорат қилган аёлни ҳибсга олди. Бу ҳақда Le Progress нашри хабар берди. 

Маълум қилинишича, аёл Facebook'даги саҳифасида сиёсатчини “мусор” деб атаган. 24 март куни унинг уйига уч нафар полиция ходими келиб, уни “давлат ҳокимияти бошқарувчисига нисбатан ҳурматсизлик” айби билан полиция бўлимига олиб кетган. Аёл устидан у яшайдиган туманнинг префекти ўринбосари Гиём Тирард шикоят қилган.

“Аёлнинг Facebook саҳифаси полиция эътиборини тортди. У 21 март куни ижтимоий тармоқда 'мусор эртага соат 13:00 да гапиради' деган пост қолдирган. Эртаси куни Эммануэл Макрон Francе 2 ва ТF1 телеканалларида интервью бериши керак эди”, — дейилади хабарда.

Аёлга нисбатан суд жараёни 20 июнь куни бўлиб ўтиши режалаштирилган. Франция Жиноят кодексининг 433-5-моддасига кўра, у бир йил қамоқ жазоси ва 15 минг евро (16 250 доллар) миқдорида жаримага тортилиши мумкин. Францияда 2023 йил январидан пенсия ёшини оширишга қарши кенг кўламли намойишлар ўтказилмоқда.