Украина Қуролли кучлари Бош штаби баҳорда қарши ҳужумни бошлашни режалаштирмоқда — бу апрель—май ойларига тўғри келиши мумкин, деди Украина мудофаа вазири Алексей Резников Эстониянинг ERR телерадиокомпаниясига берган изоҳида.
Бу ҳақда вазир журналистларнинг немис Leopard танклари қачон фронтга ташланиши ҳақидаги саволига жавобан гапирди. Резниковнинг сўзларига кўра, бу қарши ҳужум пайтида амалга оширилади, бунинг учун энг муваффақиятли деб ҳисобланган вақт Бош штаб томонидан белгиланади.
Резников, шунингдек, Украина ҳужуми бир неча йўналишда режалаштирилганини қўшимча қилиб, об-ҳаво шароити операция бошланишига таъсир қилиши мумкинлигини таъкидлади. “Баҳорда еримиз жуда нам бўлади. Фақат ғилдираги занжирли транспорт воситаларидан фойдаланиш мумкин. Ўйлайманки, апрель—май ойларида уларни (Leopard танкларини) кўрамиз”, — деди вазир.
Ҳужумнинг ўзи ҳақида гапирар экан, вазир 2023 йил давомида дунёда “Украина учун жуда ижобий ўзгаришлар” бўлишини айтди. “Ишончим комилки, биз Киев, Чернигов, Суми, Харков, Херсонда бўлгани каби, вақтинча босиб олинган ҳудудларни озод қилишда давом этамиз”, — дея қўшимча қилди у.
27 март куни Украинага Германия ваъда қилган 18 та немис Leopard 2 танки келгани маълум бўлди. 29 март куни Украина Мудофаа вазирлиги Германия танклар билан бирга юборган Marder пиёдалар учун жанговар техникаларни кўрсатди.
Бунга қадар Резников Британиядан келган Challenger 2 танкларининг видеосини ҳам улашганди. Унда вазир танклардан бирини тест-драйвдан ўтказаётгани акс этган.
Февраль ойи охирида Польшадан Leopard 2 танкларининг биринчи партияси Украинага юборилган.
21 март куни АҚШ Abrams танкларининг эски моделларини Украинага топширишга қарор қилди, чунки америкалик ҳарбийларда ҳозир ушбу моделлар мавжуд ва уларни уруш зонасига тезроқ етказиш мумкин.
Изоҳ (0)