Ўзбекистонда помидор нархи рекордларни янгилашда давом этмоқда
Ўзбекистонда иссиқхона помидорининг нархи янги рекордларни янгилашда давом этмоқда. Бу ҳақда EastFruit хабар бермоқда.
Маълумотларга кўра, сўнгги ҳафтада қизил помидорнинг ўртача улгуржи нархи 29 фоизга ошди. Жорий улгуржи нархлар эса ўтган йилги даражадан деярли 2 баравар юқори.
Бундан ташқари, сўнгги бир ҳафта ичида ушбу маҳсулотлар нархининг кескин ошиши натижасида Ўзбекистонда қизил помидорнинг жорий улгуржи нархлари EastFruit минтақасида энг юқори бўлди, — дейди лойиҳа таҳлилчилари.
EastFruit нархлари мониторингига кўра, 2023 йил 17 мартдан 24 мартгача Ўзбекистонда қизил иссиқхона помидорининг ўртача улгуржи нархи 28 минг сўмдан 36 минг сўм/кгга яъни 28,6 фоизга ошган.
Охирги уч ойда ушбу маҳсулотлар нархининг жадал ўсаётгани ҳисобга олинса, жорий йил бошидан 24 мартгача Ўзбекистонда қизил юмалоқ помидорнинг улгуржи нархлари 2,4 баробарга ошди.
2023 йил 24 март ҳолатига кўра, Ўзбекистонда қизил иссиқхона помидорининг ўртача улгуржи нархи ўтган йилнинг шу санасига нисбатан 1,8 баравар ва 2020—2021 йилларнинг шу санасига нисбатан 2,4 баравар юқори бўлди.
Ўтган ҳафтада қизил помидор нархларининг кескин ошиши натижасида Ўзбекистонда ушбу маҳсулотларнинг улгуржи нархлари EastFruit мева-сабзавотларни ҳафталик мониторинг қиладиган мамлакатлар орасида энг юқори бўлиб чиқди.
2023 йил 24 март ҳолатига кўра, минтақа мамлакатларида қизил иссиқхона помидорининг ўртача улгуржи нархи (1 кг учун):
- Ўзбекистон — 3,16 доллар;
- Польша — 2,79 доллар;
- Украина — 2,60 доллар;
- Тожикистон — 2,29 доллар;
- Молдова — 1,61 доллар;
- Грузия — 1,16 доллар.
Ўтган ҳафтада пушти помидорлар нархи ҳам кўтарилди, аммо ўсиш суръати қизил помидорга қараганда анча паст.
2023 йилнинг 17 мартидан 24 мартигача Ўзбекистонда пушти помидорнинг ўртача улгуржи нархи 33 минг сўмдан 36 минг сўм/кгга яъни 9,1 фоизга ошди.
Охирги бир ярим ой давомида ушбу маҳсулотлар нархларининг барқарор ошиб боришини ҳисобга олинса, 2023 йил 10 февралдан 24 мартгача Ўзбекистонда пушти иссиқхона помидорининг ўртача улгуржи нархи 1,8 баробарга ошди.
2023 йил 24 март ҳолатига кўра, ушбу маҳсулотларнинг ўртача улгуржи нархи ўтган йилнинг шу санасидан 1,8 баробар, 2021 йилнинг шу санасидан эса 2,1 баравар юқори бўлган.
