Усмоновнинг адвокатлари Италиядаги мол-мулки мусодараси бўйича судга мурожаат қилди

Италияда мол-мулки мусодара қилинган Алишер Усмонов ва Алексей Мордашов каби 10 нафар россиялик олигарх Лацио вилоят маъмурий судига апелляция шикояти билан мурожаат қилди.

Уларнинг адвокатлари мусодара қилинган мол-мулк гўёки россиялик олигархларга тегишли эмас, балки мустақил жамғармаларга тегишли эканлигини таъкидламоқда.

Италиянинг Corriere della Sera газетасига кўра, гап умумий қиймати 2,7 миллиард еврога тенг активлар ҳақида кетмоқда.

Нашрнинг аниқлик киритишича, аввалроқ суд Британия Виржиния оролларида рўйхатдан ўтган Асмаре компаниясининг Сан-Ремода мусодара қилинган Lady М яхтасига нисбатан Мордашовга тегишли аризасини рад этган.

Кема Кайман ороллари байроғини кўтаради ва Мордашовнинг рафиқаси Марина билан боғлиқ бўлган компанияга тегишли.

Corriere della Sera судга мурожаат қилган бошқа россияликларнинг шахсини ошкор этмади. Бироқ Италияда Владимир Соловёв, Геннадий Тимченко ва Олег Газмановнинг активлари ҳам мусодара қилинганини такидлади.

Forbes маълумотларига кўра, Алексей Мордашов 2021 йилда энг бой россияликлар орасида биринчи ўринни эгаллаган. Ўша йилнинг 28 февралида бизнесменнинг бойлиги 26,1 миллиард долларга баҳоланган.

Унинг асосий активлари орасида Северстал (директорлар кенгашини бошқарган), олтин қазиб олувчи Nord Gold компанияси, Power Machines (2018 йилда Қримга турбиналар етказиб берилиши сабабли АҚШ санкциялари остида қолган), ТUI туроператори (Мордашовнинг 34 фоиз улуши бор).

Бойлиги 14,6 миллиард долларга баҳоланган ва Forbes рўйхатида 121-ўринни эгаллаган Алишер Усмонов USM холдингининг асосчиси ва асосий акциядори (49 фоиз) ҳисобланади. “USM Металлоинвест” ва “Мегафон” компанияларига тегишли.

Россия ва Украина ўртасида уруш бошланиши муносабати билан Европа Иттифоқи иккала тадбиркорга нисбатан санкциялар жорий қилди. Халқаро ҳуқуқ факультетига эга бўлган Усмонов Европа ҳуқуқ тизими унинг ишини қандай кўриб чиқаётганидан ҳафсаласи пир бўлганини айтди.

Мордашов эса ўзига нисбатан санкциялар қўллаш сабабларини тушунмаслигини билдирди.

Мен сиёсатдан йироқман ва бутун умрим давомида Россия ва хорижда ишлаган компанияларим учун иқтисодий қиймат яратдим. Ҳозирги геосиёсий зиддиятларнинг пайдо бўлишига мутлақо алоқам йўқ, — деди тадбиркор.