Песков Россия элитасини уруш узоқ давом этиши ҳақида огоҳлантирган — The Guardian

Россия президенти Владимир Путиннинг матбуот котиби Дмитрий Песков маданий ва сиёсий элитани уруш узоқ давом этиши ҳақида огоҳлантирди. The Guardian Путин қандай қилиб Украинадаги чўзилган уруш фонида Россияни Ғарб билан “чексиз уруш”га тайёрлаётгани ҳақида мақола эълон қилди.

Нашр суҳбатдошларига кўра, 2022 йил декабрь ойи охирида Россия маданий ва сиёсий элиталари зиёфат уюштирган. Кечада Кремл матбуот котиби Песков ҳам қатнашиб, қадаҳ кўтариб уруш давом этишини айтган.

“Ўйлайманки, сиз мен нимадир дейишимни кутаётгандирсиз. Барчаси жуда қийин бўлади ва жуда узоқ давом этади”, — деган у.

Зиёфатнинг икки нафар иштирокчиси Песковнинг гаплари меҳмонларнинг кайфиятини бузгани, сабаби уларнинг аксарияти Украинадаги урушга қарши бўлганини айтди.

“Кремл матбуот котибининг нутқини эшитиш ноқулай эди. У уруш биз билан қолиши ва узоқ сафарга тайёргарлик кўришимиз кераклигини огоҳлантираётгани аниқ эди”, — деди зиёфатдан иштирок этган меҳмонлардан бири.

Россия режасига кўра, бир неча ҳафта давом этиши керак бўлган босқиндан бир йилдан кўпроқ вақт ўтгач, Путин ҳукумати жамиятни Ғарб билан уруш ҳолатига келтирмоқда ва узоқ йиллик можарога киришмоқда.

Яқинда Бурятиядаги авиация заводи ишчилари олдида сўзлаган нутқида Путин урушни яна бир бор Россиянинг омон қолиши учун кураш деб атаган.

“Биз учун бу геосиёсий вазифа эмас, балки Россия давлатчилигини сақлаб қолиш, мамлакат ва фарзандларимиз келажакдаги тараққиёти учун шарт-шароит яратиш вазифасидир”, — деган у.

“Путин урушнинг ҳар қандай аниқ мақсадлари ҳақида гапиришни деярли тўхтатди. У келажакдаги ғалаба қандай бўлиши мумкинлиги ҳақида ҳеч қандай тасаввурга эгамас. Урушнинг аниқ бошланиши ҳам, башорат қилинадиган охири ҳам йўқ”, — деди сиёсатшунос Максим Трудолюбов.