Кўпчилик кино мухлислари учун Лиам Нисон қизини асирликдан, самолёт йўловчиларини эса авиаҳалокатдан қутқара оладиган қўрқмас қаҳрамон сифатида танилган. Ҳақиқий кино ихлосмандлари эса уни Оскар Шиндлер роли ижрочиси сифатида билишади. Аммо бугун биз унинг муваффақиятли кино карераси ҳақида эмас, балки актёр ҳаётининг фожиали томони ҳақида маълумот бермоқчимиз. 2009 йилда бахтсиз ҳодиса натижасида у суюкли рафиқасидан айрилди. Шу кунгача тақдирини ҳеч ким билан боғламади — ўзини иши ва болаларига бағишлади.
Ирландиялик актёр ва инглиз актрисасининг севги ҳикояси 1993 йилда Бродвейда “Анна Кристи” спектаклида бирга рол ўйнашганидан бошланган. 29 ёшли Наташа Ричардсон ўша пайтда продюсер Роберт Фоксга турмушга чиққан эди, лекин жуфтлик аллақачон ажралиш жараёнида эди. Гарчи Лиам ўша пайтда аёлпарвар сифатида танилган бўлса-да, унинг обрўси Наташага таъсир қилмади. “Аёлларнинг уни ёқтириб қолишларидан хурсандман, чунки нима учунлигини биламан”, — дейди у.
Ричардсон ўзини ашаддий бўйдоқ деб ҳисоблаган Нисонни севиб қолади. 1994 йилда улар Нью-Йорк штатидаги кичик фермада турмуш қуришади. “Умр йўлдошим билан учрашиш бахтига эришганимга ишонолмайман”, — дейди Ричардсон.
Худди шу йили улар “Нелл” фильмида бирга рол ўйнашади. 1995 йилда тўнғич фарзанлари Майкл, кейинги йили иккинчи ўғил Дэниел туғилади.
Уларнинг муносабатлари ҳавас қиларли бўлиб, бошқа юлдузли жуфтликлар учун намуна эди. Аммо 2009 йил март ойида содир бўлган даҳшатли фожиа туфайли ҳаммаси вайрон бўлди. Ричардсон Канаданинг Квебек шаҳридаги янги трассада шлемсиз чанғи учаётганда бошидан жароҳат олади. Аввалига актриса жароҳатга аҳамият бермайди, чунки уни ҳеч нарса безовта қилмаган. “Биз қўнғироқлашдик ва у шунчаки азизим, мен ҳозиргина қорда йиқилиб тушдим, деди”, — деб эслайди Нисон 2014 йилда.
Аммо бир неча соат ўтгач, тўсатдан аёлнинг аҳволи ёмонлашади — ҳушини йўқотади ва комага тушиб қолади. Уни Монреалдаги касалхонага олиб кетишади. Ўша пайтда Торонтода “Хлоя” фильмида суратга тушаётган Лиам дарҳол касалхонага хотини олдига учиб келади. Севгилиси олдига келганида (ҳалокатдан бир неча соат ўтган эди), шифокорлар унга Ричардсоннинг аллақачон мияси ўлганини ва аппаратда ушлаб туришганини айтишади.
Маълум бўлишича, актриса бошидан жиддий жароҳат олган. Шифокорлар Нисонга Наташа миясининг рентгенограммасини кўрсатишганда, у ҳаммасини тушунади: “Мен унинг олдига бордим ва азизам, мен сени яхши кўраман. Мени эшитяпсанми, йўқми, билмайман, лекин бўлар иш бўлди. Биз сени Нью-Йоркка олиб кетамиз. Оиланг ва барча дўстларинг келади, дедим”.
Дафн маросимидан сўнг актёр Наташа билан бир нарса ҳақида олдиндан келишишганини айтади: агар улардан бири вегетатив ҳолатга тушиб қолса, иккинчиси ҳаётни таъминлаш қурилмасини ўчириши керак. “Уни қурилмага уланган ҳолда кўрганимда дарҳол келишувимиз ҳақида ўйладим”. Наташа ўзининг учта органини (юрак, буйрак ва жигар) бошқаларга беради — у уч кишининг ҳаётини сақлаб қолади.
Қайғуга дош бериш учун Лиам Нисон ишга киришади (2009 йилдан ҳозирги кунгача у 50 га яқин фильмда ўйнашга муваффақ бўлди) ва ўзини ўғилларини тарбиялашга бағишлайди. Онаси вафот этганида улар атиги 12 ва 13 ёшда эди. “Ишсиз ўзимни ёмон ҳис қилдим. Айниқса ўғилларим олдида қайғули ва тушкун кўринишни хоҳламадим”, — деди актёр.
Шундай бўлса-да, Нисон учун яқин одамини йўқотишни қабул қилиш қийин эди. Интервьюларининг бирида у Наташанинг ўлимидан 13 йил ўтган бўлса ҳам, эшик очилганида хотинининг уйга киришини, унинг овозини, столга калитларни қандай ташлаганини эшитгандек бўлишини айтади.
У суратга тушган фильмлардаги баъзи саҳналар унга айрилиқни эслатади. “Бу тўлқинга ўхшайди. Сиз уч оёқли стол каби беқарорликни чуқур ҳис қиласиз. Ер энди барқарор эмас. Кейин ҳаммаси ўтиб кетади, лекин баъзида бу мени қамраб олади”, — дейди актёр.
Нисон Наташани шунчалик соғинадики, у ҳақидаги ўйлар ҳамон уни ҳаяжонга солади. “Қайғунинг ғалати томони шундаки, унга тайёрлана олмайсиз. Сиз йиғлаб, тинчланаман деб ўйлайсиз. Аммо ғам ярим тунда келади. Бир ўзим сайр қилиб юрибман, ўзимни анча мамнун ва бахтли ҳис қиламан. Кейин тўсатдан кўкрагингизда ниманидир ҳис қилгандек бўласиз”, — дейди Нисон.
“Таша уйимиздан узоқ бўлмаган жойга, бувисининг ёнига дафн этилган. Мен ҳафтасига 1 ёки 2 марта Ташанинг қабрига бораман. Менга у билан гаплашиш ёқади”, — дея қўшимча қилади актёр.
Лиам Нисоннинг рафиқаси ҳақидаги хотираларидан, ишидан ташқари, унинг ажойиб ўғиллари ҳам қутқарди. Наташа Ричардсон вафотидан сўнг Лиамнинг қайнонаси, актриса Ванесса Редгрейв болаларни тарбиялашда унга ёрдам беради. Нисоннинг айтишича, унинг оиласи ишончли қўлларда. “Менинг ажойиб ёрдамчи жамоам бор. Агар иш билан кетсам, қайнонам бизникига кўчиб ўтади”, — дейди актёр.
Лиамнинг айтишича, у ўғилларининг ўсиши, мушакларига куч қўшилиши, янги йўлларни кашф қилишини кузатар экан, оналарининг тирик бўлишини орзу қилади — бу тажрибаларни ўғиллари билан баҳам кўриш учун. Бундан ташқари, актёрнинг таъкидлашича, у ўғиллари ўз ҳаёти ва оиласини бутунлай ўзгартириши мумкин бўлган ёмон одатларга берилиб қолмаслигидан доимо хавотирда.
Аммо у фарзандларига ишонади, чунки улар ақлли болалар. Актёр ўғиллари билан жуда фахрланади ва улар нима бўлишидан қатъи назар, оталари доимо улар билан бирга бўлишини билишларини таъкидлайди.
Вояга етганида Лиамнинг тўнғич ўғли Майкл отасининг дуоси билан онасининг фамилиясини олди ва расман Майкл Ричардсон бўлди. У шунчаки онасини ёнида ҳис қилишни хоҳларди, чунки у ажойиб аёл эди. Майкл ҳам ота-онасининг изидан бориб, гарчи отаси дастлаб бунга қарши бўлган бўлса ҳам Голливудда ўз карерасини бошлаган.
Лиам ва Наташанинг кенжа ўғли Дэниел ҳам актёрлик ва рақамли медиани ўрганган ҳолда кўнгилочар соҳада ўзини синаб кўрган. У бир неча марта фильмлар ишлашда саҳна ортида меҳнат қилди, лекин охир-оқибат мода саноатига ўтди. 2017 йилда Дэниел ўзининг Pine Outfitters экологик тоза кийимлар тармоғини ишга туширди.
Хотини вафотидан кейин Лиам Нисон ҳеч қачон Наташа Ричардсондек аёлни топа олмади. Унда бир нечта ўткинчи ҳислар бўлган бўлса-да, улар жиддий муносабатларга айланмади.
2016 йилда Лиам мухлислари билан марҳум хотинини ёдга олди. У барчани умр йўлдошини қадрлашга ва ҳар бир кундан унумли фойдаланишга чақирди. “Яқинларингиз билан кўпроқ вақт ўтказинг. Чунки кун келиб смартфонингиздан кўзингизни узганингизда улар ёнингизда бўлмайди. Ҳар бир кунингизни сўнгги кунингиздек севинг”, — деб ёзади актёр.
Изоҳ (0)