Голливуд актёри Жонни Депп кутилмаганда Англиядаги қишлоқлардан бирига кўчиб ўтганини ва у ерда тинч ҳаёт кечираётганини маълум қилди. Жонни Депп яқинда берган интервьюларининг бирида Голливудни Сомерсетдаги кичик қишлоққа алмаштиргани ҳақида гапириб берди.
“Мен шунчаки характерли жойларни яхши кўраман. Турли жойларда ҳар хил уйларим бор ва уларнинг барчаси мен учун ўзига хос нарсани англатади. Ростини айтсам, жуда уятчан инсонман. Бу Британия ва, айниқса, Сомерсетнинг ажойиб жиҳатларидан бири. Шунчаки ўзим билан бўламан, бу эса ёқимли”, — дейди Депп.
Актёрнинг сўзларига кўра, бу қишлоқ аҳолиси унинг дунё бўйлаб машҳурликка эришганига эътибор бермайди. Шунинг учун у бу ерда ўзини жуда қулай ҳис этади.
“Британияликлар жуда зўр ва сиз билан ҳаддидан ошмасдан, қўшнисидек саломлашади. Инсонларнинг автограф сўрашига ёки қисқа суҳбат қуришни хоҳлашларига қарши эмасман, бироқ оила аъзоларим билан вақт ўтказганимда бу ишни қилишни истамайман. Дўконга борганимда атрофимда селфига тушмоқчи бўлган инсонлар билан ўралган ҳолда харид қилишим мумкин. Маълум бир нуқтага қадар бунга қарши эмасман, бироқ баъзида бундай инсонларга жуда кўп дуч келаман”, — дейди актёр.
Изоҳ (0)