Ko‘pchilik kino muxlislari uchun Liam Nison qizini asirlikdan, samolyot yo‘lovchilarini esa aviahalokatdan qutqara oladigan qo‘rqmas qahramon sifatida tanilgan. Haqiqiy kino ixlosmandlari esa uni Oskar Shindler roli ijrochisi sifatida bilishadi. Ammo bugun biz uning muvaffaqiyatli kino karyerasi haqida emas, balki aktyor hayotining fojiali tomoni haqida ma’lumot bermoqchimiz. 2009-yilda baxtsiz hodisa natijasida u suyukli rafiqasidan ayrildi. Shu kungacha taqdirini hech kim bilan bog‘lamadi — o‘zini ishi va bolalariga bag‘ishladi.
Irlandiyalik aktyor va ingliz aktrisasining sevgi hikoyasi 1993-yilda Brodveyda “Anna Kristi” spektaklida birga rol o‘ynashganidan boshlangan. 29 yoshli Natasha Richardson o‘sha paytda prodyuser Robert Foksga turmushga chiqqan edi, lekin juftlik allaqachon ajralish jarayonida edi. Garchi Liam o‘sha paytda ayolparvar sifatida tanilgan bo‘lsa-da, uning obro‘si Natashaga ta’sir qilmadi. “Ayollarning uni yoqtirib qolishlaridan xursandman, chunki nima uchunligini bilaman”, — deydi u.
Richardson o‘zini ashaddiy bo‘ydoq deb hisoblagan Nisonni sevib qoladi. 1994-yilda ular Nyu-York shtatidagi kichik fermada turmush qurishadi. “Umr yo‘ldoshim bilan uchrashish baxtiga erishganimga ishonolmayman”, — deydi Richardson.
Xuddi shu yili ular “Nell” filmida birga rol o‘ynashadi. 1995-yilda to‘ng‘ich farzanlari Maykl, keyingi yili ikkinchi o‘g‘il Deniyel tug‘iladi.
Ularning munosabatlari havas qilarli bo‘lib, boshqa yulduzli juftliklar uchun namuna edi. Ammo 2009-yil mart oyida sodir bo‘lgan dahshatli fojia tufayli hammasi vayron bo‘ldi. Richardson Kanadaning Kvebek shahridagi yangi trassada shlemsiz chang‘i uchayotganda boshidan jarohat oladi. Avvaliga aktrisa jarohatga ahamiyat bermaydi, chunki uni hech narsa bezovta qilmagan. “Biz qo‘ng‘iroqlashdik va u shunchaki azizim, men hozirgina qorda yiqilib tushdim, dedi”, — deb eslaydi Nison 2014-yilda.
Ammo bir necha soat o‘tgach, to‘satdan ayolning ahvoli yomonlashadi — hushini yo‘qotadi va komaga tushib qoladi. Uni Monrealdagi kasalxonaga olib ketishadi. O‘sha paytda Torontoda “Xloya” filmida suratga tushayotgan Liam darhol kasalxonaga xotini oldiga uchib keladi. Sevgilisi oldiga kelganida (halokatdan bir necha soat o‘tgan edi), shifokorlar unga Richardsonning allaqachon miyasi o‘lganini va apparatda ushlab turishganini aytishadi.
Ma'lum bo‘lishicha, aktrisa boshidan jiddiy jarohat olgan. Shifokorlar Nisonga Natasha miyasining rentgenogrammasini ko‘rsatishganda, u hammasini tushunadi: “Men uning oldiga bordim va azizam, men seni yaxshi ko‘raman. Meni eshityapsanmi, yo‘qmi, bilmayman, lekin bo‘lar ish bo‘ldi. Biz seni Nyu-Yorkka olib ketamiz. Oilang va barcha do‘stlaring keladi, dedim”.
Dafn marosimidan so‘ng aktyor Natasha bilan bir narsa haqida oldindan kelishishganini aytadi: agar ulardan biri vegetativ holatga tushib qolsa, ikkinchisi hayotni ta'minlash qurilmasini o‘chirishi kerak. “Uni qurilmaga ulangan holda ko‘rganimda darhol kelishuvimiz haqida o‘yladim”. Natasha o‘zining uchta organini (yurak, buyrak va jigar) boshqalarga beradi — u uch kishining hayotini saqlab qoladi.
Qayg‘uga dosh berish uchun Liam Nison ishga kirishadi (2009-yildan hozirgi kungacha u 50 ga yaqin filmda o‘ynashga muvaffaq bo‘ldi) va o‘zini o‘g‘illarini tarbiyalashga bag‘ishlaydi. Onasi vafot etganida ular atigi 12 va 13 yoshda edi. “Ishsiz o‘zimni yomon his qildim. Ayniqsa o‘g‘illarim oldida qayg‘uli va tushkun ko‘rinishni xohlamadim”, — dedi aktyor.
Shunday bo‘lsa-da, Nison uchun yaqin odamini yo‘qotishni qabul qilish qiyin edi. Intervyularining birida u Natashaning o‘limidan 13 yil o‘tgan bo‘lsa ham, eshik ochilganida xotinining uyga kirishini, uning ovozini, stolga kalitlarni qanday tashlaganini eshitgandek bo‘lishini aytadi.
U suratga tushgan filmlardagi ba’zi sahnalar unga ayriliqni eslatadi. “Bu to‘lqinga o‘xshaydi. Siz uch oyoqli stol kabi beqarorlikni chuqur his qilasiz. Yer endi barqaror emas. Keyin hammasi o‘tib ketadi, lekin ba’zida bu meni qamrab oladi”, — deydi aktyor.
Nison Natashani shunchalik sog‘inadiki, u haqidagi o‘ylar hamon uni hayajonga soladi. “Qayg‘uning g‘alati tomoni shundaki, unga tayyorlana olmaysiz. Siz yig‘lab, tinchlanaman deb o‘ylaysiz. Ammo g‘am yarim tunda keladi. Bir o‘zim sayr qilib yuribman, o‘zimni ancha mamnun va baxtli his qilaman. Keyin to‘satdan ko‘kragingizda nimanidir his qilgandek bo‘lasiz”, — deydi Nison.
“Tasha uyimizdan uzoq bo‘lmagan joyga, buvisining yoniga dafn etilgan. Men haftasiga 1 yoki 2 marta Tashaning qabriga boraman. Menga u bilan gaplashish yoqadi”, — deya qo‘shimcha qiladi aktyor.
Liam Nisonning rafiqasi haqidagi xotiralaridan, ishidan tashqari, uning ajoyib o‘g‘illari ham qutqardi. Natasha Richardson vafotidan so‘ng Liamning qaynonasi, aktrisa Vanessa Redgreyv bolalarni tarbiyalashda unga yordam beradi. Nisonning aytishicha, uning oilasi ishonchli qo‘llarda. “Mening ajoyib yordamchi jamoam bor. Agar ish bilan ketsam, qaynonam biznikiga ko‘chib o‘tadi”, — deydi aktyor.
Liamning aytishicha, u o‘g‘illarining o‘sishi, mushaklariga kuch qo‘shilishi, yangi yo‘llarni kashf qilishini kuzatar ekan, onalarining tirik bo‘lishini orzu qiladi — bu tajribalarni o‘g‘illari bilan baham ko‘rish uchun. Bundan tashqari, aktyorning ta'kidlashicha, u o‘g‘illari o‘z hayoti va oilasini butunlay o‘zgartirishi mumkin bo‘lgan yomon odatlarga berilib qolmasligidan doimo xavotirda.
Ammo u farzandlariga ishonadi, chunki ular aqlli bolalar. Aktyor o‘g‘illari bilan juda faxrlanadi va ular nima bo‘lishidan qat’i nazar, otalari doimo ular bilan birga bo‘lishini bilishlarini ta’kidlaydi.
Voyaga yetganida Liamning to‘ng‘ich o‘g‘li Maykl otasining duosi bilan onasining familiyasini oldi va rasman Maykl Richardson bo‘ldi. U shunchaki onasini yonida his qilishni xohlardi, chunki u ajoyib ayol edi. Maykl ham ota-onasining izidan borib, garchi otasi dastlab bunga qarshi bo‘lgan bo‘lsa ham Gollivudda o‘z karyerasini boshlagan.
Liam va Natashaning kenja o‘g‘li Deniel ham aktyorlik va raqamli mediani o‘rgangan holda ko‘ngilochar sohada o‘zini sinab ko‘rgan. U bir necha marta filmlar ishlashda sahna ortida mehnat qildi, lekin oxir-oqibat moda sanoatiga o‘tdi. 2017-yilda Deniyel o‘zining Pine Outfitters ekologik toza kiyimlar tarmog‘ini ishga tushirdi.
Xotini vafotidan keyin Liam Nison hech qachon Natasha Richardsondek ayolni topa olmadi. Unda bir nechta o‘tkinchi hislar bo‘lgan bo‘lsa-da, ular jiddiy munosabatlarga aylanmadi.
2016-yilda Liam muxlislari bilan marhum xotinini yodga oldi. U barchani umr yo‘ldoshini qadrlashga va har bir kundan unumli foydalanishga chaqirdi. “Yaqinlaringiz bilan ko‘proq vaqt o‘tkazing. Chunki kun kelib smartfoningizdan ko‘zingizni uzganingizda ular yoningizda bo‘lmaydi. Har bir kuningizni so‘nggi kuningizdek seving”, — deb yozadi aktyor.
Izoh (0)