Таниқли актёр, хонанда Шоҳруххоннинг отаси Алишер Йўлдошев YouTube каналларидан бирига берган интервьюсида ўғлининг болалиги, қизиқишлари ҳамда унинг ёшлигида Фаррух Зокировдан фотиҳа олгани ҳақида гапириб берди.
“Шоҳрухни ҳам театрга олиб келгандим, саҳнага чиқиб қарасам олдимда турибди”
— Шоҳрух уч ёшлигида диплом учун спектакл топширганман. Марҳум профессор Муҳаммаджон Раҳмонов биринчи қаторда ўтирар эди, ўша пайтда Театр ва рассомчилик институтининг ректори шу киши бўлган. Спектакл топшираётган вақтимда ҳам биринчи қаторда ўтирган, рол ўйнаётгандим. Шоҳрухни ҳам театрга олиб келгандим, саҳнага чиқиб қарасам олдимда турибди. Курсдошларимга қараб тур, саҳнага чиққан пайтим чиқиб кетмасин, дегандим. Улар ҳам иш билан бўлиб кетган, қарасам ёнимда турибди.
Қарадим-да, ролимни давом эттириб кетавердим, спектакл тугагандан кейин ўша профессор: “Биласизларми, битта инсон ролини қойилмақом қилиб ўйнади, қолган ҳеч қайсингиз рол ўйнай олмадингизлар. Болача бор-ку, битта шу яхши рол ўйнади”, — деган эди. Ўша Шоҳруххоннинг биринчи саҳнага чиқиши эди.
“Фаррух Зокиров Шоҳрухга фотиҳа берган”
— Шоҳрух кўпинча бизнинг олдимизда, гастролда юрар эди. Уни Зебо билан бирга гастролга олиб борар эдик, унинг ҳам қизиқиши шундан бошланган бўлса керак. Ашулалар айтар эди, уйимизнинг олдида Фаррух Зокиров турар эди, бориб ундан фотиҳа олган. Ҳали мактабга бормасди, телевизорларда кўриб устоз, менга фотиҳа беринг, деб борган. Ўша пайтда Фаррух Зокиров Шоҳрухга фотиҳа берган.
“Фарзанднинг кўнглига қараш керак, бу унинг хоҳиши”
— Шоҳрух менинг катта ўғлим, сирдошим. У бир иш қиладиган бўлса, мен билан гаплашади, мен бирор иш қиладиган бўлсам, у билан маслаҳатлашаман. Фарзанднинг кўнглига қараш керак, бу унинг хоҳиши. Ҳозир яхши яшашяпти, иккита неварам бор. Уларнинг турмушига менинг ҳавасим келади. Барибир Аллоҳ пешанасига нимани ёзган бўлса, шу бўлади. Келиним ҳам яхши, эл танийди.
Изоҳ (0)