Шавкат Мирзиёев 29 март куни Хитой Коммунистик партияси Марказий қўмитаси Сиёсий бюроси аъзоси, Шинжон-Уйғур автоном раёни Компартияси Партқўми котиби Ма Синжуй бошчилигидаги ХХР делегацияси билан учрашув ўтказди, деб хабар бермоқда Президент матбуот хизмати.
Маълум қилинишича, учрашувда Ўзбекистон ҳудудлари ва ШУАР ўртасидаги ўзаро манфаатли амалий ҳамкорликни йўлга қўйиш масалалари кўриб чиқилди. Ўзбекистон ҳудудларида Хитойнинг етакчи компаниялари иштирокида қайта тикланувчи энергетика, транспорт инфратузилмасини ривожлантириш, саноат парклари ва қишлоқ хўжалиги кластерларини ташкил этиш соҳаларида қўшма лойиҳаларни амалга ошириш масалалари эътибор марказида бўлди.
Учрашув аввалида Ма Синжуй ХХР раиси Си Цзиньпиннинг саломи ва энг эзгу тилакларини ҳамда Хитой раҳбари лавозимига қайта сайлангани муносабати билан йўлланган табриклар учун миннатдорлик билдирди.
2021 йилнинг сентябрида Самарқанд шаҳрида ўтган ва Ўзбекистон—Хитой ҳар томонлама стратегик шериклик муносабатларида янги даврни бошлаб берган тарихий саммитнинг сермаҳсул натижалари катта мамнуният билан қайд этилди.
Ўзбекистон—Қирғизистон—Хитой темирйўлини қуриш лойиҳасини жадаллаштиришда икки томон ҳам манфаатдор экани таъкидланди.
Тошкент, Самарқанд ва бошқа вилоятларнинг Шинжон-Уйғур автоном раёни билан, шу жумладан савдо, логистика, тиббиёт, қишлоқ хўжалиги, туризм ва таълим соҳаларида кўп қиррали ҳамкорликни кенгайтириш учун кенг имкониятлар мавжудлиги айтилди.
Давлат раҳбари ўзаро мулоқот ва алмашинувни фаоллаштириш, ташриф ва бизнес форумларини ташкил этиш, устувор лойиҳа ва дастурларни илгари суриш бўйича алоҳида “йўл харитаси”ни қабул қилиш юзасидан топшириқлар берди.
Изоҳ (0)