“Ҳозирда суриштирув ишлари олиб бориляпти”. ТИВ Европа Иттифоқи Ўзбекистонга санкция киритиши ҳақидаги хабарга изоҳ берди

Бир қатор хориж нашрлари Европа Иттифоқи Россияга ёрдам бераётган Марказий Осиё давлатлари, жумладан, Ўзбекистонга санкция қўлламоқчи экани ҳақида хабар берди. “Дарё” мухбири ҳолат юзасидан Ўзбекистон Ташқи ишлар вазирлигидан изоҳ олди.

Тармоқда тарқалган хабарда Ўзбекистон Россияга “икки мақсадли” товарлар етказиб беришни кўпайтиргани, руслар эса ундан ҳарбий техникаларни таъмирлашда фойдаланиши айтилганди. Ўзбекистон ТИВ матбуот хизмати раҳбари Аҳрор Бурхоновдан бу ҳақда сўралганда у вазирликка ҳозиргача ҳеч қандай расмий ҳужжат келиб тушмаганини билдирди.

“Бизга бирорта расмий маълумот келиб тушмади. Шунинг учун ҳозирча бу борада бирор нарса дея олмаймиз”, — деди Аҳрор Бурхонов.

Матбуот хизмати раисининг қўшимча қилишича, ҳозирда суриштирув ишлари олиб борилмоқда.

“Санкция киритилиши ҳақидаги маълумот Европа Иттифоқининг расмий саҳифасида ҳам мавжуд эмас, бу ҳозирча тасдиқланмаган хабар. Шунинг учун ҳали муносабат билдиролмаймиз”, — деб айтиб ўтди у.

Манба — Европа Иттифоқининг махфий ҳужжати

Эслатиб ўтамиз, The Telegraph 24 март куни махфий ҳужжатларга таяниб Евроиттифоқ Ўзбекистон, Қозоғистон ва Қирғизистонга санкция қўллаш масаласини муҳокама қилаётганини хабар қилганди. Унда ёзилишича, мазкур МДҲ давлатлари орқали Россияга кейинчалик ҳарбий техникаларни (дронлар, бронитехникалар) таъмирлашда ишлатиладиган маиший техникалар олиб кирилмоқда.

“Сўнгги вақтларда Марказий Осиё давлатлари билан Европа ўртасида истеъмол товарлари айланмаси кескин ошган. Юқоридаги ҳолат ўз исботини топса, ушбу давлатлар бизнес вакилларига Европа бозорларидан товарлар харид қилиш имконияти чекланиши мумкин”, — дейилади хабарда.