Россиянинг “Азимут” авиакомпанияси Сочи—Урганч йўналиши бўйича тўғридан тўғри рейсларни йўлга қўяди. Бу ҳақда Uzbekistan Airports матбуот хизмати хабар берди.
Қайд этилишича, 29 март куни авиакомпания самолёти маҳаллий вақт билан Сочи—Урганч—Сочи йўналиши бўйича биринчи мунтазам рейсни амалга оширган. Анъанага мувофиқ, ичида 61 йўловчи бўлган Sukhoi Superjet 95 самолёти сувли арка билан тантанали кутиб олинган.
Режага кўра, Сочидан “Урганч” халқаро аэропортига рейслар ҳафтасига бир маротага — чоршанба кунлари амалга оширилади.
Таъкидлаш керакки, “Азимут” авиакомпанияси Урганчдан Россиянинг бошқа шаҳарларига — Москва ва Минеральние Водига ҳам рейсларни йўлга қўйган.
Шунингдек, Россия авиаташувчиси 27 мартдан бошлаб Минеральниe Води—Самарқанд—Минеральние Води йўналиши бўйича парвозлар частотасини оширган. Авиарейслар ҳафтасига икки маротаба — сешанба ва жума кунлари амалга оширилади. Олдинлари парвозлар фақат сешанба кунлари эди.
Аввалроқ Тошкентдан Токиога авиақатновлар қайта тикланиши, Польшадан Ўзбекистонга мунтазам авиақатновлар йўлга қўйилиши, Uzbekistan Airways Лондон, Франкфурт ва Рига шаҳарларига қатновлар сонини ошириши тўғрисида хабар берилганди.
Изоҳ (0)