Шотландия соғлиқни сақлаш вазири Ҳамза Юсуф ҳукмрон Шотландия национал партиясининг (ШНП) янги раҳбари этиб сайланди. Шу асосда у ҳукуматнинг илк мусулмон раҳбарига айланади. Бу ҳақда ШНП миллий котиби Лорна Финн 27 март куни партия аъзолари ўртасида овоз бериш натижалари якунланганидан кейин эълон қилди.
Сайловнинг иккинчи босқичида Юсуф 52,1 фоиз овоз билан ғалаба қозонди. Уни 26 мингдан сал кўпроқ партия аъзоси қўллаб-қувватлади. Иккинчи ўринни Шотландия молия вазири Кейт Форбс (23,9 минг овоз ёки 47,9 фоиз), учинчи ўринни жамият хавфсизлиги бўйича собиқ вазир Аш Риган (5,6 минг овоз) эгаллади.
Юсуф февраль ойи ўрталарида истеъфога чиқишини эълон қилган Шотландия бош вазири Никола Стерженнинг ўрнини эгаллайди. Стержен 2014 йилдан бери Шотландия ҳукуматини бошқариб келарди.
ШНП ўз олдига қўйган мақсад — Британиядан мустақилликка эришиш. Сайловда ғалаба қозонганидан сўнг, Юсуф Шотландиянинг ажралиб чиқиши “ҳозирги авлод даврида” содир бўлиши кераклигини айтди. Бироқ сўнгги сўровномалар кўпчилик Шотландия мустақиллигига қарши эканини кўрсатмоқда.
Ҳамза Юсуф 1985 йилда Глазгода туғилган. Унинг отаси Буюк Британияга Покистондан, онаси Кениядан кўчиб келган.
Англия, Шотландия, Уэлс ва Шимолий Ирландияни ўз ичига олган Бирлашган Қиролликнинг 68 миллионлик умумий аҳолисидан тахминан 5,5 миллионини шотландлар ташкил қилади. Мамлакат 1999 йилдан бошлаб ўз парламенти ва ҳукуматига эга.
Шотландия мустақиллиги бўйича биринчи референдум 2014 йилда ўтказилган. Унда минтақада яшовчи фуқаролардан “Мамлакат мустақил бўлиши керакми?” деган саволга жавоб бериш сўралган эди. Якуний натижаларга кўра, овоз берганларнинг 55,3 фоизи ажралиб чиқишга қарши бўлган, 44,7 фоизи эса мустақилликни ёқлаган.
2022 йил ноябрь ойида Буюк Британия Олий суди Британия парламентининг розилигисиз Шотландия иккинчи марта мустақиллик референдумини ўтказа олмаслиги ҳақида қарор чиқарди.
Изоҳ (0)