Исроил бош вазири Нетаньяху норозилик намойишлари сабаб суд ислоҳотини музлатишга қарор қилди — ОАВ

Исроил бош вазири Биньямин Нетаньяху мамлакатда кенг кўламли норозилик намойишларига сабаб бўлган суд-ҳуқуқ ислоҳотларини музлатиб қўйишга қарор қилди, деб хабар бермоқда Haaretz нашри.

27 мартга ўтар кечаси намойишчилар Тель-Авивдаги асосий магистрални тўсиб қўйган, Нетаньяхунинг Қуддусдаги қароргоҳига бостириб кирган. Оломонни тарқатиш учун полиция махсус жиҳозлардан фойдаланган.

Суд ислоҳоти туфайли Исроилда умумий иш ташлаш эълон қилинди. Хусусан, Ҳистадрут савдо марказ ва фабрика касаба уюшмаси норозилик билдириш мақсадида умумий иш ташлади. Иш ташлашга тиббиёт ходимлари, болалар муассасалари, шунингдек, Исроил турли Адлия вазирлигининг амалдорлари ва айрим ходимлари қўшилган.

Мамлакатнинг йирик аэропорти Бен Гурион ходимлари барча рейсларни бекор қилди. Аэропорт фақат ҳаводаги рейсларнинг қўнишига рухсат бермоқда.

Суд-ҳуқуқ ислоҳотларига қарши оммавий норозилик намойишлари бир неча ойдан бери давом этмоқда. Навбатдаги кескинлик 26 март куни, Биньямин Нетаньяху ҳукумат сиёсатини танқид қилган Исроил мудофаа вазири Ёав Галлантни ишдан бўшатганидан кейин юз берди. Вазир мамлакат расмийларини ислоҳотларни тўхтатишга чақирганди. Исроил шаҳарларидаги норозилик намойишлари полиция билан тўқнашувларга айланиб кетди. Бу орада Исроил президенти Ицхак Герцог ҳукуматни оммавий норозиликларга сабаб бўлган суд-ҳуқуқ ислоҳотини тўхтатишга чақирди.

Нетаньяху бошлаган суд ислоҳоти Олий суд ваколатлари қонун ва ҳукумат қарорлари билан чекланишни, Вазирлар Маҳкамаси судьяларни танлаш устидан назоратни ўз қўлига олишини назарда тутади. Шундай қилиб, бирор қонун ҳатто Олий суд томонидан мамлакат конституциясига зид деб топилса ҳам, парламент уни қабул қилиш имкониятига эга бўлади.