Агар Украина фронтда бир қатор муваффақиятли қарши ҳужумларни бошласа, бу Россия президенти Владимир Путинни Киев шартлари асосидаги музокарага ундашга ёрдам беради, дейилади Америка урушни ўрганиш институти (ISW) таҳлилчиларининг кунлик ҳисоботида.

Таҳлилчиларнинг фикрича, Украина ҳарбийлари жанговар ҳаракатлар йўналишини ўзгартира олишга қодир эканини намойиш қилиши керак.

“Украина Қуролли кучлари Россия армиясига шундай зарар етказиши керакки, Путин ва унга яқин доираларга рус қўшинларининг ҳарбий амалиётларни давом эттириши орқали уруш натижаларини яхшилашга умид қила олмаслиги аён бўлсин”, — дея тушунтирди экспертлар.

Улар бунинг учун ғалабалар “йирик бўлиши” зарурлигини ҳам таъкидлади.

“Урушни музокаралар йўли билан ҳал қилиш ёки Путинни жанговар ҳаракатларни тўхтатишга мажбур қилиш истиқболларини яратиш учун Украинага оператив даражадаги кўплаб йирик ғалабалар зарур”, — дейилади ҳисоботда.

Аввалроқ Украина президенти Владимир Зеленский мамлакат ўқ-дори ва қурол-яроғ етишмаслиги сабабли ҳозирча қарши ҳужумга ўта олмаслигини маълум қилганди. У мамлакат шарқидаги вазиятни оғир деб баҳолади.

“Биз ҳамкорларимиздан ўқ-дорилар келишини кутмоқдамиз”, — деди Зеленский. “(Қарши ҳужумни) ҳали бошлай олмаймиз”, — деб қўшимча қилди у. Украина раҳбарининг қайд этишича, Киев узоқ кута олмайди.