Андижон шаҳрида вояга етмаган болаларга ўз машинасини ижарага берган шахс жавобгарликка тортилди. Бу ҳақда “Замон” информацион дастурида маълум қилинди.
Қайд этилишича, Андижон вилояти ИИБ ЖХХ ЙҲХБга Андижон шаҳри 17-умумтаълим мактабидан мурожаат келиб тушган. Унда ўқувчиларнинг қоидабузарлик содир этгани ҳақида хабар берилган. Аниқланишича, уч нафар 8-синф ўқувчиларига соатига 60 минг сўмдан икки соатга автомашина топширилган.
“Машинам уйда бекор турганди. Кундузи билан киракашлик қилдим, кечки пайт газимга пул чиқиб қолар деган мақсад бергандим. Уларда бирор муаммо чиқиб қолса, ўзлари ҳал қилиши ҳақида келишдик. Ёнида ўтириб, ҳайдашни эплай олгани учун бердим”, — дейди транспорт воситасининг эгаси.
Ҳолат бўйича Matiz автомобили эгасига нисбатан маъмурий баённома расмийлаштирилган ва машина жарима майдонига жойлаштирилган.
Маълумот учун, биргина Тошкент шаҳрида 2022 йилда 1200 та ЙТҲ содир этилган, бу 2021 йилдаги ҳолатлардан (1073) қарийб 130 тага кўп. Ушбу даврда ЙТҲлар оқибатида ҳалок бўлганлар сони 136 нафарини ташкил этади.
Изоҳ (0)