“Тошкент ҳудудий электр тармоқлари” бош ҳисобчи ўринбосари 15 минг доллар пора билан қўлга тушди

Тошкент вилоятида тадбиркорнинг муаммосини ҳал қилиб бериш эвазига пора сўраган “Ҳудудий электр тармоқлари” корхонаси ходимига ҳукм ўқилди. Бу ҳақда “Замон” информацион дастурида маълум қилинди.

Қайд этилишича, “Тошкент ҳудудий электр тармоқлари” корхонасининг 46 ёшли бош ҳисобчи ўринбосари ўз мансаб ваколатидан фойдаланиб тадбиркорни пора беришга қизиқтирган. Иш ҳужжатларига кўра, “Ўзбекистон миллий электр тармоқлари” АЖ томонидан мутахассис жалб қилинган ҳолда Тошкент вилояти прокуратураси ва ДХХ томонидан ўтказилган текширувда якка тартибдаги тадбиркорга тегишли корхонада текшириш ўтказилган ва йирик истеъмолчининг технологик йўқотиш миқдорини кам кўрсатгани аниқланган. Бундан хабар топган судланувчи тадбиркорга текширувчи таниши эканини айтиб, ҳолатни унинг фойдасига ҳал қилиб бериш эвазига 15 минг доллар сўраган.

У Тошкент шаҳар Яшнобод туманида келишилган пулни фирибгарлик йўли билан қўлга киритган вақтида департаментнинг Тошкент вилояти бошқармаси, вилоят прокуратураси ва ДХХ ходимлари томонидан ушланган.

Судланувчи Жиноят кодексининг тегишли моддалари билан айбли деб топилиб, 6 йил-у 6 ой муддатга озодликдан маҳрум этилди.

Аввалроқ Ўзбекистонда бир кунда 2,5 миллиард сўмдан ортиқ электрдан ноқонуний фойдаланиш ҳолатлари аниқлангани тўғрисида хабар берилганди.