Andijon shahrida voyaga yetmagan bolalarga o‘z mashinasini ijaraga bergan shaxs javobgarlikka tortildi. Bu haqda “Zamon” informatsion dasturida ma’lum qilindi.
Qayd etilishicha, Andijon viloyati IIB JXX YHXBga Andijon shahri 17-umumta’lim maktabidan murojaat kelib tushgan. Unda o‘quvchilarning qoidabuzarlik sodir etgani haqida xabar berilgan. Aniqlanishicha, uch nafar 8-sinf o‘quvchilariga soatiga 60 ming so‘mdan ikki soatga avtomashina topshirilgan.
“Mashinam uyda bekor turgandi. Kunduzi bilan kirakashlik qildim, kechki payt gazimga pul chiqib qolar degan maqsad bergandim. Ularda biror muammo chiqib qolsa, o‘zlari hal qilishi haqida kelishdik. Yonida o‘tirib, haydashni eplay olgani uchun berdim”, — deydi transport vositasining egasi.
Holat bo‘yicha Matiz avtomobili egasiga nisbatan ma’muriy bayonnoma rasmiylashtirilgan va mashina jarima maydoniga joylashtirilgan.
Ma’lumot uchun, birgina Toshkent shahrida 2022-yilda 1200 ta YTH sodir etilgan, bu 2021-yildagi holatlardan (1073) qariyb 130 taga ko‘p. Ushbu davrda YTHlar oqibatida halok bo‘lganlar soni 136 nafarini tashkil etadi.
Izoh (0)