Қирғизистон пойтахтида Исландиянинг фахрий консулхонаси очилди. Расмий очилиш маросимида Қирғизистон республикаси ташқи ишлар вазири ўринбосари Алмаз Имангазиев ва Исландиянинг Қирғизистондаги элчиси Аурни Тор Сигурдссон иштирок этди. Бу ҳақда Қирғизистон Ташқи ишлар вазирлиги матбуот хизматига таяниб, “Дарё”нинг республикадаги мухбири хабар берди.
Қирғизистонлик дипломат Бишкекда Исландиянинг фахрий консулхонаси очилиши билан табриклади. У ушбу қадам мамлакатлар ўртасидаги халқаро муносабатларни фаоллаштириш имконини беришига ишонч билдирди.
Учрашувда Имангазиев элчига Қирғизистон республикасидаги гидроэнергетика лойиҳалари ҳақида сўзлаб берди.
Сигурдссон Исландия икки томонлама ҳамкорликнинг турли жиҳатлари, жумладан, савдо алоқаларидан манфаатдор эканини таъкидлади.
Франция, Швейцария, Италия билан дипломатик паспорт эгалари учун виза талабларини бекор қилиш бўйича тузилган келишувларни инобатга олган ҳолда, қирғиз дипломати Исландия билан ҳам шундай халқаро шартнома тузиш имкониятини кўриб чиқишни таклиф қилди.
Элчи бу масала Исландия томони билан муҳокама қилинаётганини қайд этди. Бундан ташқари, Исландия Бишкек ва Рейкявик ўртасида ҳаво транспорти ва икки томонлама солиққа тортишни бекор қилиш бўйича ўзаро келишувлардан манфаатдор экани қайд этилди.
Яқин орада Исландияда ҳам Қирғизистоннинг фахрий консулхонаси очилиши мумкин.
Коротовских Евгений, Бишкек
Изоҳ (0)