Ўзбекистон Марказий Осиёда ягона тўлов тизимини яратишни таклиф қилди. Инвестициялар, саноат ва савдо вазирлигининг хабар қилишича, бу масала 17 март куни бўлиб ўтган АҚШ ва Марказий Осиё мамлакат ҳукуматлари ўртасида савдо ва инвестициялар бўйича Ҳадли битим (TIFA) кенгаши йиғилишида айтиб ўтилди.
Самарқандда ўтказилган ушбу йиғилиш АҚШ Савдо вакили идораси (USTR) ва Тижорат ҳуқуқини ривожлантириш дастури (CLDP) Департаменти кўмагида ташкил қилинган. Тадбирда Ўзбекистон, АҚШ, Қозоғистон, Қирғизистон, Тожикистон, Туркманистон ва Покистоннинг тегишли вазирлик ва идоралари делегациялари иштирок этди.
Инвестициялар, саноат ва савдо вазири Лазиз Қудратов Марказий Осиё мамлакатлари ўртасида савдо-иқтисодий, сармоявий, транспорт ва бошқа соҳаларда ҳамкорлик қилиш учун кенг имкониятлар мавжудлигини таъкидлади.
Шу нуқтаи назардан, ишга солинмаган ресурс ва имкониятлардан фойдаланган ҳолда биргаликда чора-тадбирлар кўриш, жумладан, Марказий Осиё давлатларининг электрон тижорат тўғрисидаги қонун ҳужжатларини бирхиллаштириш ва ягона мустақил арбитраж тизимини яратиш, ягона тўлов тизимига эга бўлган товар ва хизматлар етказиб берувчилар учун минтақавий платформани яратиш, хавфларни прогнозлаш ва бошқариш мақсадида Data-cеnter’лар ҳамда экспорт ва импорт қилувчилар базаларини яратиш, санитария-эпидемиология осойишталигини таъминлашни таклиф этди.
Қишлоқ хўжалиги маҳсулотларини сертификатлашнинг электрон тизимларини, CLDP тавсияларига асосланган божхона қоида ва тартиботларини жорий этиш, фитосанитария талабларини уйғунлаштириш, илғор тажриба алмашиш, минтақада хотин-қизларнинг иқтисодий имкониятларини кенгайтириш бўйича ташаббуслар ҳам билдирилди.
Тадбир якунлари бўйича иштирокчиларнинг савдо-иқтисодий ва сармоявий ҳамкорликни янада мустаҳкамлаш бўйича умумий қарашлари, муҳокама қилинган лойиҳа ва ташаббусларни амалга ошириш чора-тадбирлари ўз ифодасини топган қўшма баёнот қабул қилинди.
Изоҳ (0)