Ўзбекистонлик меҳнат муҳожирлари Қозоғистонда ишлаётган хорижликлар бешлигига кирди

Ўзбекистон қўшни Қозоғистон Республикасини ишчи кучи билан таъминлаш борасида бешинчи ўринда туради. Қозоғистонга ишлаш учун келадиган муҳожирларнинг кўчилигини хитойликлар ташкил қилади — 3411 киши. 1 март ҳолатига кўра, Қозоғистон республикасида жами 13,4 минг нафар хориж фуқароси меҳнат қилмоқда, деб хабар берди “Дарё”нинг Қозоғистондаги мухбири республика Меҳнат ва аҳолини ижтимоий муҳофаза қилиш вазирлиги матбуот хизматига таяниб. Вазирлик ҳар йили хорижий мутахассисларни жалб қилиш учун квотани белгилайди ва тақсимлайди — бу йил учун 22 226 киши (0,24 фоиз).

Вазирлик чет элликларга тўрт тоифада ишлаш учун рухсатномалар берган. Булар: раҳбарлар ва уларнинг ўринбосарлари, таркибий бўлинмалар раҳбарлари, мутахассислар ва малакали ишчилардир. Ушбу рўйхатда энг кўп ўринни мутахассислар эгаллайди  —7199 киши, энг ками эса раҳбарлар ва ўринбосарлар (565 та рухсатнома). Шунингдек, 400 нафарга яқин киши мавсумий ишлар билан банд.

Аксарият хорижликлар қурилиш, тоғ-кон саноати ва карерларда ишлайди. Касбий, илмий ва техник фаолиятда, ишлаб чиқаришда, шунингдек, қишлоқ, ўрмон ва балиқ хўжалигида меҳнатга муҳожирлар сони анча кам.

Қозоғистонга ишлаш учун асосан Хитой, Ҳиндистон, Туркия, Буюк Британия ва Ўзбекистондан чет элликлар келади. Ҳозир республикада 1640 нафар иш берувчи хорижлик мигрантлар хизматидан фойдаланмоқда. Қайд этиш жоизки, ходимларнинг 96 фоизи Қозоғистон республикаси фуқароларидир.

Светлана Шестернёва, Олмаота