Бутун дунё бўйлаб Twitter Blue’га обуна бўлиш имконияти пайдо бўлди

Эндиликда Twitter’да Blue обунаси барча мамлакатлар учун очилди. Бу ҳақда ижтимоий тармоқ эгаси Илон Маск хабар берди.

Twitter Verified энди бутун дунё бўйлаб мавжуд!, — деб ёзди Маск ижтимоий тармоқдаги саҳифасида.

Twitter Blue жорий этилган вақтда унга фақат 5 давлатдан — АҚШ, Канада, Буюк Британия, Австралия ва Янги Зеландиян обуна бўлиши мумкин эди.

Ҳозирда обуначиларга бир твитда 280 та ўрнига 4 000 тагача белгидан фойдаланиш, уларни 30 дақиқа ичида таҳрирлаш, юқори ўлчамли видеоларни юклаш, твитлар занжирини бир матн сифатида кўриш каби имтиёзлар берилмоқда.

Маълумотларга кўра, яқин келажакда Blue обунасида рекламалар сони камаяди. Бундан ташқари, хабарларга жавоб излаш ва кўришда уларнинг твитларига устунлик берилади.

Январь ойидан бери Twitter Blue интернетда ойига 8 доллар, iOS ва Android иловаларида эса 11 доллар туради. Бундан ташқари, агар обуна бир йил учун сайт орқали олдиндан сотиб олинса, ойига 7 доллар туради.

Twitter Blue 2022 йил ноябрь ойида ишга туширилган. Машҳур шахслар ва компаниялар аккаунтларининг ҳақиқийлигини тасдиқловчи верификация белгиси учун тўлов жорий этилиши компанияни сотиб олган Илон Маскнинг Twitter’даги дастлабки қадамларидан бири бўлган.

Аввалроқ Twitter’да рекламасиз янада қимматроқ обуналар пайдо бўлиши кутилаётгани ҳақида хабар берилганди.