Twitter’da reklamasiz yanada qimmatroq obunalar paydo bo‘lishi kutilmoqda

Twitter ijtimoiy tarmog‘ida foydalanuvchilarni reklamadan qutqaradigan yangi obuna paydo bo‘lishi kutilmoqda. Bu haqda Ilon Mask o‘z Twitter sahifasida xabar berdi.

Ta’kidlanishicha, bu obuna hozirgi obunadan qimmatroq bo‘ladi.

“Sizga reklamalarni olib tashlash imkonini beruvchi qimmatroq obuna taqdim etiladi”, — deb yozgan Mask.

Unga ko‘ra, hozirda Twitter’da reklamalar juda ko‘p va tez-tez uchraydi.

Noyabr oyi boshida Twitter dasturining yangilangan versiyasida ko‘k verifikatsiya belgisini sotib olish imkoniyati haqida ma’lumot paydo bo‘ldi. Bu Mask kompaniyani sotib olgandan keyin taklif qilgan birinchi yangilikdir.

11-noyabrda esa ijtimoiy tarmoq Twitter Blue premium-obuna foydalanuvchilarining akkauntlari haqiqiyligini bildiruvchi ko‘k “galochka”larni oyiga sakkiz dollar evaziga sotishdan voz kechdi. Bunga sabab esa ularni soxta akkauntlar sotib ola boshlagani bo‘ldi.

13-dekabrdan Twitter ijtimoiy tarmog‘ida akkauntlarga verifikatsiya belgisini (ko‘k “galochka”) olish imkonini beruvchi Twitter Blue obunasining sotuvi qayta boshlandi.