Amazon яна 9 минг нафар ходимини ишдан бўшатмоқчи

Amazon компанияси турли бўлимларидан яна 9 минг кишини ишдан бўшатишни режалаштирмоқда. Бу ҳақда компания раҳбари Энди Жессининг ходимларга йўллаган мактубига таяниб, “Интерфакс” хабар берди.

Келгуси ҳафталарда амалга ошириладиган ишдан бўшатишлар Amazon Web Services булутли бўлими ишчиларига, технология ишлаб чиқувчилари ва реклама бўлими ходимларига, шунингдек, Twitch стриминг хизматига таъсир қилади.

“Қийин қарор бўлди, лекин бу узоқ истиқболда компанияга фойда келтиради”, — деб ёзади Жесси ўз билдиришномасида.

Amazon раҳбарияти январь ойи бошида 18 000 дан ортиқ иш ўринларини қисқартиришини эълон қилганди.

Amazon акциялари 20 март кунги савдоларда 1,5 фоизга арзонлашди. Йил бошидан бери компания капиталлашуви 16 фоизга ўсиб, 1,01 триллион долларни ташкил этди.