“Электрқишлоққурилиш”нинг 58,41 фоиз акциялар пакети Россия компаниясига сотилди. Бу ҳақда “UzAssets инвестиция компанияси” хабар берди.
Тегишли хусусийлаштириш дастурларига мувофиқ, “UzAssets”нинг “Электрқишлоққурилиш” устав капиталидаги 58,41 фоиз акциялар пакети 93,2 млрд сўмга “Уралская энергетическая строителная компания”га сотиш бўйича келишувга эришилди.
“UzAssets” 2021 йил 19 ноябрда “Электқишлоққурилиш” акциядорлик жамияти давлат улушини сотувга қўйган.
Бунда Grant Thornton халқаро консалтинг компанияси хусусийлаштириш бўйича консультант сифатида жалб этилган ва Dentons халқаро юридик компанияси ҳуқуқий масалаларда кўмаклашган.
Маълумотларга кўра, жами инвесторлардан активни сотиб олишга қизиқиш билдириш бўйича 7 та сўров келиб тушган.
Талабгорлар хусусийлаштириш жараёнида иштирок этишини таъқиқлаши мумкин бўлган маъмурий, ҳакамлик ёки бошқа суд жараёнларининг йўқлиги ҳамда Европа Иттифоқи ва АҚШнинг, шунингдек йирик халқаро молия институтларининг санкциялари рўйхатига киритилмаганлиги юзасидан ўрганилган.
Энг яхши мажбуриятга эга бўлган таклиф UESК томонидан тақдим этилган. “UzAssets” компания келажакда “Электрқишлоққурилиш”нинг барқарор ривожланишини таъминлашини ҳамда турли кучланишга эга электр тармоқлари объектларини қуриш бўйича Ўзбекистоннинг йирик саноат корхоналаридан бири бўлишини кутмоқда.
Изоҳ (0)