Хитой Бирлашган Миллатлар Ташкилоти Хавфсизлик Кенгашининг Шимолий Кореядаги инсон ҳуқуқлари бузилишига бағишланган норасмий йиғилишини жонли эфирга узатишни тақиқлаганидан сўнг, АҚШ Пекинни КХДРдаги инсон ҳуқуқлари бузилишини яширишга уринаётганликда айблади. Бу ҳақда Reuters хабар берди.
“Хавфсизлик Кенгашининг баъзи аъзолари режим(Шимолий Корея ҳукумати)ни жавобгарликдан ҳимоя қилишга қаттиқ уринмоқда”, — деди АҚШнинг БМТдаги элчиси Линда Томас-Гринфильд.
Reuters маълумотларига кўра, хитойлик дипломатлар Хавфсизлик кенгашидаги ҳамкасбларига мактуб йўллаб, ушбу мавзуни муҳокама қилиш “ҳеч қандай фойда келтирмаслигини” ва Хитой томони бошидан бу учрашувни ўтказишга қарши бўлганини билдирган.
Хитой, шунингдек, инсон ҳуқуқлари масалаларини БМТ Хавфсизлик Кенгашининг барча 15 аъзоси муҳокама қилмаслиги керак, деб таъкидлайди. Унга кўра, бундай учрашувлар БМТнинг бошқа органлари, масалан, Инсон ҳуқуқлари ташкилоти кенгаши ёки Бош ассамблея билан чекланиши керак. “Жонли эфир учун БМТ веб-телевидениясидан фойдаланиш ресурсларни беҳуда сарфлашдир”, — деди хитойлик дипломат Хин Жишенг АҚШ ва Альбания мезбонлик қилган учрашувни шарҳлар экан.
Норасмий йиғилишнинг веб-трансляциясини ташкил қилиш учун Хавфсизлик Кенгашининг барча 15 та вакили бунга рози бўлиши керак. Reuters хабарига кўра, Хитойнинг трансляцияни тўсиб қўйиш қарорига қарамай, учрашув оммага очиқ тарзда ўтиб, унда ОАВ вакиллари иштирок этган. Шимолий Корея учрашувда иштирок этмаган.
Пхенян инсон ҳуқуқлари бузилиши ҳақидаги айбловларни рад этиб келади ва мамлакатдаги оғир гуманитар вазиятда санкцияларни айблайди. Шимолий Корея 2006 йилдан бери баллистик ракета ва ядровий дастури туфайли БМТ чекловлари остида.
Изоҳ (0)