Украина Россия билан 1993 йил сентябрь ойида Ялтада тузилган стратегик ракета комплексларига техник хизмат кўрсатиш бўйича келишувни бекор қилди. Тегишли фармонни Украина президенти Владимир Зеленский имзолади, ҳужжат унинг сайтида эълон қилинди.
“Украина ва Россия Федерацияси ўртасида Стратегик кучларнинг стратегик ракета комплекслари ишлаши устидан кафолат ва муаллифлик назоратини амалга ошириш тартиби тўғрисидаги келишув бекор қилинсин”, — дейилади хабарда.
Украина Ташқи ишлар вазирлиги зиммасига Россия томонини ушбу келишувнинг бекор қилингани ҳақида хабардор қилиш топширилди.
Бундан ташқари, Киев 1993 йил 24 декабрда Ашхободда тузилган Мустақил Давлатлар Ҳамдўстлиги мамлакатлари ички ишлар органлари ходимларини пенсия таъминоти ва давлат суғуртаси билан таъминлаш тартиби тўғрисидаги шартномадан ҳам чиқди.
Ушбу ҳужжатга кўра, МДҲ мамлакатлари ички органлари ходимларининг Совет Иттифоқи даврида иттифоқ органларидаги хизмати иш стажига ўтар эди. Украина Ташқи ишлар вазирлиги ушбу келишувнинг бошқа томонларини Киевнинг ундан чиқиши ҳақида хабардор қилиши керак.
2022 йилнинг 24 февралида Зеленский Россия билан дипломатик муносабатларни узганини эълон қилганди. Истиқболли бошқарув қарорлари маркази экспертларининг ҳисоб-китобларига кўра, ўша пайтда Киев ва Москва ўртасида постсовет даврида имзоланган 23 та келишув бор эди.
Изоҳ (0)