Ўзбекистон ҳудудига Россиядан ноқонуний қурол олиб ўтиш билан боғлиқ ҳолатларга чек қўйилди. Бу ҳақда Қорақалпоғистон Республикаси Божхона бошқармаси хабар берди.
Қайд этилишича, “Довут-ота” чегара божхона пости ходимлари томонидан Фея лақабли хизмат ити ёрдамида Россиядан Ўзбекистонга кириб келган Cadillac русумли автотранспорт воситаси божхона кўригидан ўтказилган. Кўрик давомида Россия фуқаросига тегишли бўлган, божхона ходимининг оғзаки сўровида айтилмаган ва йўловчи божхона декларациясида тақдим қилинмаган 1 дона газли тўппонча, 9 дона тўппончанинг газ баллонлари, 1050 дона “Вистрел калибр 4,5 мм” номли дроблар ва 2 дона газли пистолет учун кабураларни ўз эҳтиёжи учун олиб келаётгани аниқланган.
Худди шундай яна бир ҳолатда, “Довут-ота” чегара божхона пости орқали Россиядан мамлакатга кириб келган Ford русумли автотранспорт воситасида Ўзбекистонда фаолият юритаётган МЧЖларнинг бирининг номига олиб келинаётган халқаро курерлик жўнатмалари божхона кўздан кечирувидан ўтказилган.
Натижада кузатув ҳужжатларида ва йўловчи божхона декларациясида ёзиб кўрсатилмаган, тегишли рухсатномаларга эга бўлмаган оқ рангли полиэтилен қоп ичида аввал фойдаланилган 1 дона қора рангли “4,5 mm (VV CAL)” ёзувли пневматик пистолет борлиги аниқланган.
Мазкур ҳолатлар юзасидан божхона органлари томонидан терговга қадар текширув ҳаракатлари олиб борилмоқда.
Пневматик, сигнал берувчи, улоқтириш қуролини, ўзини ўзи ҳимоя қилиш қуролини ички ишлар органларининг тегишли рухсатномаларисиз реализация қилиш, олиш, сақлаш, олиб юриш, ташиш, коллекциялаш, кўргазмага қўйиш, улардан фойдаланиш, Ўзбекистон ҳудудига олиб кириш ёки Ўзбекистон ҳудудидан олиб чиқиш, шунингдек, Ўзбекистон ҳудуди орқали транзит олиб ўтиш — қуролни мусодара қилиб, фуқароларга базавий ҳисоблаш миқдорининг 15 бараваридан 30 бараваригача (9 миллион сўм), мансабдор шахсларга эса — 25 бараваридан 50 бараваригача (15 миллион сўм) миқдорда жарима солишга ёки 15суткагача маъмурий қамоққа олишга сабаб бўлади.
Изоҳ (0)