“Дарё” нашри 17 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Хитой президентининг Россияга ташрифидан нималар кутиляпти?
“Украина инқирозини сиёсий йўл билан ҳал қилиш”нинг 12 та режасини тақдим этган Хитой президенти 20-22 март кунлари давлат ташрифи билан Россияда бўлади.
Си Цзиньпин Владимир Путиннинг таклифига кўра Москвага келяпти. Икки президентнинг охирги музокараси 2022 йил декабрь ойида онлайн тарзда бўлган. Хитой Ташқи ишлар вазирлиги хабарига кўра, ушбу ташриф “икки давлат ўртасидаги муносабатлар ривожига янги суръат бағишлайди
Эслатиб ўтамиз, Россиядаги музокаралардан сўнг Си Цзиньпин Украина президенти Владимир Зеленский билан уруш бошидан бери илк суҳбатини ўтказади.
Украинадаги вазиятга келсак, ҳозирда Бахмутдаги украин аскарлари ўқ дориларга муҳтож. Украина Қуролли Кучлари ҳамкорлардан қурол етказишда тезроқ ҳаракат қилишини сўрамоқда.
Украина Ташқи ишлар вазири BBC’га берган интервьюсида ҳозир Украина ҳарбий ва иқтисодий жиҳатдан Ғарб ёрдамига боғлиқ бўлиши мумкин, аммо тинчлик даврида мамлакатнинг ғалла экспорти катта ҳажмга эга дея таъкидлаган.
Хитой ва Покистон зиддияти сабаб Совет давридаги ҳарбий техникалар янгилана бошлади
Покистон кучлари, Ҳимолай тоғларидаги баҳсли чегара бўйлаб Хитой қўшинлари билан зиддиятда турган бир пайтда Ҳиндистон Совет давридаги ҳарбий техникани модернизация қилишни бошлади.
Reuters хабарига кўра айни пайтда мамлакат армия учун катта миқдорда қурол сотиб олишни маъқуллаган. Ракеталар, вертолётлар, артиллерия ва радиоэлектрон курашиш тизимларини сотиб олишга 8,5 миллиард доллар сарфланади.
Ҳиндистон бу сафар қуролларни хориждан сотиб олиш ўрнига буюртмаларнинг барчасини маҳаллий ишлаб чиқариш компанияларига беришни режалаштирмоқда. Бу эса ўз-ўрнида Ҳиндистон ҳарбий-саноатини мустаҳкамлашни мақсад қилган, амалдаги бош вазир Нарендра Модининг стратегиясини намоён қилади.
Ҳиндистон шу билан бирга ҳарбий-денгиз флоти ривожига ҳам алоҳида эътибор қаратмоқда, чунки ҳукумат ўтган йилдан буён Хитойнинг Ҳинд океанидаги фаоллиги ошганидан хавотирда.
Наврўз ёмғирлар билан келмоқда, сел сув тошқинлари 9 вилоятда кузатилиши мумкин
Наврўз байрамига тайёргарлик Ўзбекистоннинг барча вилоятларида бошланди. 19-22 март кунлари байрам муносабати билан очиқ осмон остида турли сайиллар ва тадбирлар ўтказилади.
Аммо байрам арафаси қандай об-ҳаво бўлишини аниқлаб олиш асло зарар қилмайди. Айни пайтда “Ўзгидромет” директори 18-22 март кунлари тўққизта вилоятда сел-сув тошқини юзага келиши мумкинлигидан огоҳлантирмоқда.
Маълум қилинишича, ушбу саналарда кутилаётган кучли ёмғирлар ёғиши сабабли республиканинг қуйидаги тоғолди ва тоғли ҳудудларида сел-сув тошқин ҳодисалари юзага келиши мумкин:
- Қашқадарё вилояти Яккабоғ, Деҳқонобод, Чироқчи, Китоб, Шаҳрисабз, Қамаши, Ғузор туманларида;
- Сурхондарё вилояти Сариосиё, Узун, Олтинсой, Денов, Бойсун, Шеробод, Шўрчи, Қумқўрғон, Музработ туманларида;
- Самарқанд вилояти Ургут, Самарқанд, Булунғур, Нуробод, Қўшработ, Каттақўрғон, Паяриқ, Жомбой, Иштихон туманларида;
- Навоий вилояти Хатирчи, Навбаҳор, Нурота, Конимех, Кармана туманларида;
- Жиззах вилояти Зомин, Бахмал, Ғаллаорол, Шароф Рашидов, Фориш, Янгиобод туманларида;
- Тошкент вилояти Оҳангарон, Бўстонлиқ, Паркент, Пискент, Ўрта Чирчиқ, Юқори Чирчиқ туманларида ва Ангрен, Олмалиқ шаҳарларида;
- Наманган вилояти Поп, Косонсой, Чортоқ, Чуст, Наманган, Янгиқўрғон туманларида;
- Фарғона вилояти Сўх, Шоҳимардон, Фарғона, Бешариқ туманларида;
- Андижон вилояти Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманларида ва Хонобод шаҳрида.
“Тоғолди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан эҳтиёткорлик чораларини кўришларини сўраймиз”, — дейилади хабарда.
Изоҳ (0)