Россия Ташқи ишлар вазирлиги расмий вакили Мария Захарова Халқаро Гаага судининг Россия президенти Владимир Путинни ва болалар омбудсмани Мария Лвова-Беловани ҳибсга олиш ордерига муносабат билдирди. Бу ҳақда “РИА Новости” хабар берди.
“Халқаро жиноий суд қарорлари мамлакатимиз учун, жумладан, ҳуқуқий нуқтаи назардан ҳам ҳеч қандай маънога эга эмас. Россия Халқаро Жиноят судининг Рим статути иштирокчиси эмас ва унга кўра ҳеч қандай мажбуриятларни ўз зиммасига олмайди. Россия бу орган билан ҳамкорлик қилмайди ва Халқаро суд томонидан ҳибсга олишнинг мумкин бўлган ‘рецептлари’ биз учун қонуний кучга эга бўлмайди”, — деди Мария Захарова.
Халқаро Гаага суди 17 март куни Россия президенти Владимир Путинни ҳибсга олишга ордер берди. Россия президенти Украинанинг босиб олинган ҳудудларидан болаларни Россияга ноқонуний равишда депортация қилганликда гумонланмоқда. Шунингдек, суд Россиянинг болалар ҳуқуқлари бўйича комиссари Мария Лвова-Беловани ҳибсга олиш учун ҳам ордер берган.
Маълумот учун, Путин “Рим статути”ни ратификация қилган 123 та давлатнинг бирига ташриф буюрган тақдирда маҳаллий ҳокимият томонидан ҳибсга олиниши ва судга тортилиши керак. Бундай давлатлар орасида Тожикистон ҳам бор.
Изоҳ (0)