Халқаро атом энергияси агентлиги (МАГАТЭ) инспекторлари Ливия полигонларидан бирида 2,5 тонна атрофидаги табиий уран изсиз ғойиб бўлганини аниқлади. Бу ҳақда Reuters хабар бермоқда.
МАГATЭ раҳбари Рафаэл Гросси ташкилотга аъзо мамлакатларга уран сақланадиган жойда унинг бир бочкаси ҳам топилмаганини айтди. Улар қаерга кетгани номаълум.
Уран ҳозир Ливия ҳукуматининг назоратида бўлмаган объектдан йўқолган. Уран сақланадиган жойни текшириш 2022 йилга мўлжалланган эди, бироқ хавфсизлик нуқтаи назаридан у қолдирилганди. Текширув 14 март куни ўтказилди.
Текширув давомида МАГATЭ инспекторлари аввал Ливия томонидан эълон қилинган UOC (уран рудаси концентрати) шаклидаги тахминан 2,5 тонна табиий уран бўлган 10 та бочка жойида йўқлигини аниқлади. МАГATЭ “ядровий модда қандай йўқолгани ва ҳозир қаерда эканини аниқлаш” ниятида.
Ливия 2003 йилда ядровий қурол дастуридан воз кечган. Муаммар Қаддафий вафотидан кейин мамлакатда сиёсий инқироз давом этмоқда. Ливияда қўш ҳокимият мавжуд.
Изоҳ (0)