Эрон ҳукумати сўнгги пайтларда мамлакат бўйлаб ўқувчи қизларнинг заҳарланишига алоқадор 110 кишини ҳибсга олди. Бу ҳаракатлар қизларнинг мактабга боришига тўсқинлик қилишга уриниш деб тахмин қилинмоқда.
Дастлабки заҳарланиш ҳолатлари 2022 йил ноябрда Теҳрон яқинидаги Қум шаҳрида қайд этилган. Ўшанда 18 нафар ўқувчи шифохонага етказилган. Улардан бири оёқларини ҳис қилмаётганини айтган, бошқалари нафас қисилишидан шикоят қилган. Айрим ота-оналар фарзандларини мактабга юборишдан бош тортган.
Қум воқеаларидан кейин, бир неча ҳафта ичида шундай ҳолатлар, жумладан Теҳрон ва Боружерд шаҳрида қайд этилган бўлса, 2023 йил март ойи бошидан заҳарланишлар сони кескин ошган. 6 мартга келиб, мамлакатдаги 31 вилоятнинг 23 тасидан бундай ҳодисалар ҳақида хабарлар келиб тушди.
Ҳодисаларни ўрганаётган ҳукумат комиссияси маълум қилишича, 25 вилоятдаги 230 мактабда 5 000 га яқин ўқувчи ўзини ёмон ҳис қилаётгани ҳақида шикоят қилган. Ҳуқуқ ҳимоячилари уларнинг сони 7 000 дан ошиқлигини айтмоқда.
Аввалроқ The Guardian ўз манбаларига таяниб, қизлар кузда ҳукуматга қарши бўлиб ўтган намойишларда қатнашгани ва фаол сиёсий позицияси учун заҳарланганини ёзди.
Заҳарланиш ҳолатларини даволашга ихтисослашган шифокор мавжуд далилларни ҳисобга олган ҳолда, “бу заҳарланишнинг энг кўп эҳтимолий сабаби кучсиз фосфорорганик модда бўлиши мумкин”лигини айтган. Унинг сўзларига кўра, заҳарланиш сабаби “мамлакат ичидаги ва ташқарисидаги экстремистик гуруҳлар ёрдамида намойишчиларни қўрқитиш” истаги бўлган. “Улар яқинда бўлиб ўтган норозилик намойишларида фаол иштирок этган ўқувчи қизлардан ўч олмоқчи”, — деб тушунтирди шифокор.
Эрон президенти Иброҳим Раисий юзлаб ўқувчи қизларнинг заҳарланишида Теҳрон душманларини айблади.
Изоҳ (0)