Йил бошидан бери қанча одамга ипотека кредити берилгани маълум бўлди

Марказий банк 2023 йилнинг 2 ойида аҳолига ажратилган ипотека кредитлари бўйича маълумот берди.

Унга кўра, аҳолига ажратилган ипотека кредитлари қолдиғи 2018 йилга қараганда 4,9 баробарга кўпайиб, жорий йилда 47,6 трлн сўмга етган.

Жорий йилнинг январь—февраль ойларида аҳолига 1,9 трлн сўмлик ипотека кредити ажратилган. Ўтган йилнинг мос даврида бу кўрсаткич 1,7 трлн сўмни ташкил этган эди.

Кредит расмийлаштираётган мижозлар 9 213 нафар бўлса, уларнинг 63 фоизини эркаклар, 37 фоизини аёллар ташкил этган. Ипотека кредитларининг асосий қисмини 31-50 ёш оралиғидаги фуқаролар олмоқда — 70 фоиз.

Тошкент шаҳри 2022 йилда ажратилаётган ипотека кредитлари бўйича қолган вилоятларга қараганда бир неча бор олдинда бормоқда — 633,8 млрд сўм. 

Кредитларнинг 69 фоизи янги қурилган — бирламчи бозордаги уйларга ажратилган. Йил бошидан бери 10 мингга яқин фуқарога ипотека кредитлари берилган.

Йил бошидан бери ипотека кредитларини молиялаштириш манбалари:

• Молия вазирлиги — 1 трлн сўм;
• Банк ўз маблағлари — 652,9 млрд сўм;
• Ипотекани қайта молиялаштириш манбалари — 235,4 млрд сўм.

Банклар томонидан ажратиладиган ипотека кредитларининг ўртача фоиз ставкаси 23,5 фоиз бўлиб турибди. Янги тартиб доирасида ажратилган ипотека кредитлари эса 17,2 фоиз.

Аввалроқ ўзбекистонликларнинг уйга бўлган талаби ошгани ҳақида хабар берилганди.